देवचुली १६ मा शुक्रबारदेखि वडा स्तरीय फुटबल प्रतियोगिता हुँदै

देवचुली। देवचुली नगरपालिका वडा नम्बर १६ मा शुक्रबारदेखि प्रथम वडा स्तरीय फुटबल प्रतियोगिता हुने भएको छ। युवा तथा खेलकुद विकास समिति देवचुली १६ को आयोजना तथा धुसेरी सामुदायिक वन उपभोक्ता समिति र लायन्स क्लब अफ रजहर सिटीको सह आयोजनामा चैत २३ गतेदेखि बैशाख ३ गतेसम्म देवचुली १६ को देवचुली माध्यमिक विद्यालयको खेल मैदान रजहरमा प्रतियोगिता सुरु गर्न लागिएको हो।

प्रतियोगितामा पुरुषतर्फ देवचुली नगरपालिका भित्रका १४ वडाका १६ टिमबीच प्रतिष्पर्धा हुने खेल तालिकामा सार्वजनिक गरिएको छ। प्रतियोगितामा हरेक दिन दुई खेल खेलाइने युवा तथा खेलकुद विकास समिति देवचुली १६ का अध्यक्ष आनन्द बानियाँले जानकारी दिए। प्रतियोगितामा चैत २३ देखि चैत २७ गतेसम्म पहिलो चरणका खेलहरु,चैत २८ र २९ गते क्वाटर फाईनलका खेलहरु, चैत ३० गते सेमिफाइनलका खेलहरु र बैशाख ३ गते फाइनल खेल हुनेछ ।

प्रतियोगितामा प्रथम हुने वडाले नगद ५१ हजार १ सय ११ रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २५ हजार ५ सय ५५ रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको युवा तथा खेलकुद विकास समिति देवचुली १६ का अध्यक्ष आनन्द बानियाँले बताए।