हुप्सेकोटका दुई विद्यालयमा बालविवाह तथा मानव बेचबिखन सम्बन्धि सचेतना

नवलपुर । हुप्सेकोटका दुई विद्यालयहरुमा बालविवाह तथा मानव बेचबिखन सम्बन्धि सचेतना तालिम सम्पन्न गरिएको छ। असल छिमेकी नेपाल पोखराको आयोजनामा हुप्सेकोट ४ मा रहेका ज्वाला माध्यमिक विद्यालय र हुप्सिकोट माध्यमिक विद्यालयमा सचेतना कार्यक्रम गरिएको हो ।

बालविवाह न्यूनीकरण ,जर्बजस्ती विवाह र मानव बेचबेखिन सम्बन्धि सचेतना प्रवाह गर्न तालिम गरिएको असल छिमेकी नेपाल कास्कीका सामाजिक परिचालिका दिपा महतोले जानकारी दिनुभयो । हुप्सेकोटमा केही विद्यालय तथा समुदायमा बालविवाह सम्बन्धि सचेतना प्रवाह गरिने उहाँले बताउनुभयो । संस्थाले मंगलबार ज्वाला माध्यमिक विद्यालय र बुधबार हुप्सेकोट माध्यमिक विद्यालयमा सचेतनामुलक कार्यक्रम गरिएको हो। महतोका अनुसार बिहीबार हुप्सेकोट माध्यमिक विद्यालयमा अर्को समुहका लागि तालिमको आयोजना गरिएको छ।

तालिममा बालविवाह भनेको के हो ?, बालविवाहबाट हुने असरहरु, बालविवाह गर्दा हुने कानुनी कारवाही, बालविवाह अन्त्य गर्नका लागि गर्नुपर्ने कार्यहरु, बालबालिका हिंसाबाट जोगिने उपायहरु, मानव बेचबिखन भनेको के हो ? मानव बेचबिखनबाट जोगिन ख्याल गर्नुपर्ने कुराहरु लगायतका विषयमा जागृति बाल तथा युवा सरोकार नेपालका महासचिव दिपक शर्मा र देवचुली खबरका प्रबन्ध निर्देशक राजु चापागाईले सहजीकरण गर्नुभएको थियो।

बालबालिकाहरुलाई बालविवाह सम्बन्धि सचेतना तालिम निकै नै प्रभावकारी हुने ज्वाला माध्यमिक विद्यालयका व्यवस्थापन समितिका अध्यक्ष अर्जुन पाण्डेले बताउनुभयो । समुदायमा अझै पनि बालविवाहको घटना भइरहेकाले निरन्तर सचेतनामुलक कार्यक्रम गर्नुपर्ने उहाँले जोड दिनुभयो । बालविवाह न्यूनीकरणका लागि सरोकारवालाहरुले विशेष योजना बनाउन आवश्यक रहेको उहाँले बताउनुभयो ।