वडास्तरीय फुटबल प्रतियोगिता : देवचुली १५ र देवचुली १६ सेमिफाइनल प्रवेश

देवचुली। देवचुली नगरपालिकामा संचालित वडास्तरीय फुटबल प्रतियोगितामा बुधबार भएका खेलमा देवचुली १५ र देवचुली १६ विजयी हुँदै सेमिफाइनल प्रवेश गरेका छन् । देवचुली नगर युवा तथा खेलकुद विकास समितिको आयोजना तथा वडा युवा तथा खेलकुद विकास समिति देवचुली ८ को सह आयोजनामा सेन्टर प्लट खेल मैदानमा संचालित प्रतियोगिताको बुधबारको पहिलो क्वाटर फाइनल खेलमा देवचुली १५ ले देवचुली ७ लाई हराउँदै सेमिफाइनल प्रवेश गरेको हो। देवचुली १५ ले देवचुली ७ लाई १-० गोल अन्तरले हराउँदै विजयी भएको हो। खेलमा देवचुली १५ का सुसन आलेले गोल गरेका थिए।

त्यसै गरि बुधबार भएको देवचुली ५ का विरुद्ध देवचुली १६ बीचको दोस्रो क्वाटर फाइनल खेलमा देवचुली १६ विजयी भएको छ । देवचुली १६ ले देवचुली ५ लाई ट्राइबेकरमा हराउँदै दोस्रो चरणमा प्रवेश गरेको हो । निर्धारित समयको खेलमा दुवै समुहबाट गोलरहित भएपछि खेल ट्राईबेकरमा गएको हो । ट्राइबेकरमा देवचुली १६ ले देवचुली ५ लाई ४-३ गोल अन्तरले हराउँदै विजयी भएको हो ।

बुधबार भएको पहिलो खेलमा देवचुली १५ का सुसन आले म्यान अफ दि म्याच भएका थिए भने दोस्रो खेलमा देवचुली १६ का विमल क्षेत्री म्यान अफ दि म्याच भएका थिए।

देवचुली नगरपालिका भित्रका १६ वडाका १७ टिमबीच प्रतिष्पर्धा हुने प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको वडा युवा तथा खेलकुद विकास समिति देवचुली ८ का अध्यक्ष सुरज सोतीले बताए।प्रतियोगिता अन्तर्गत बिहीबार क्वाटर फाइनलको तेस्रो खेल देवचुली ९ का विरुद्ध देवचुली ११ र चौथो खेल देवचुली १ का विरुद्ध देवचुली १३ बिच हुने आयोजकले जनाएको छ।