वडास्तरीय फुटबल प्रतियोगिता : शुक्रबार देवचुली ९ र देवचुली १५ विजयी

देवचुली। देवचुली नगरपालिकामा संचालित वडास्तरीय फुटबल प्रतियोगितामा शुक्रबार देवचुली ९ र देवचुली १५ विजयी भएको छ।देवचुली नगर युवा तथा खेलकुद विकास समितिको आयोजना तथा वडा युवा तथा खेलकुद विकास समिति देवचुली ८ को सह आयोजनामा सेन्टर प्लट खेल मैदानमा संचालित प्रतियोगिताको शुक्रबारको पहिलो खेलमा देवचुली ९ ले देवचुली १० लाई हराउँदै दोस्रो चरणमा प्रवेश गरेको हो। खेलमा देवचुली ९ ले देवचुली १० लाई १-० गोल अन्तरले हराउँदै विजयी भएको हो। देवचुली ९ बाट दिपिन रानाले गोल गरेका थिए।

त्यसै गरि आज भएको देवचुली ३ का विरुद्ध देवचुली १५ बीचको दोस्रो खेलमा देवचुली १५ ट्राइबेकरमा विजयी हुँदै दोस्रो चरणमा प्रवेश गरेको छ। निर्धारित समयको खेलमा दुवै टिमबाट बराबरी हुँदै ट्राईबेकरमा देवचुली १५ ले देवचुली ३ लाई ४-३ गोल अन्तरले हराएको हो। आजको पहिलो खेलमा देवचुली ९ का दिपिन राना म्यान अफ दि म्याच घोषित भएका थिए भने दोस्रो खेलमा देवचुली १५ का सागर जिसी म्यान अफ दि म्याच घोषित भएका थिए ।

देवचुली नगरपालिका भित्रका १६ वडाका १७ टिमबीच प्रतिष्पर्धा हुने प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको वडा युवा तथा खेलकुद विकास समिति देवचुली ८ का अध्यक्ष सुरज सोतीले बताए।

प्रतियोगिता अन्तर्गत शनिबार पहिलो खेल देवचुली ४ का विरुद्ध देवचुली १३ र दोस्रो खेल देवचुली १२ का विरुद्ध देवचुली १६ बिच हुने आयोजकले जनाएको छ।