देवचुलीमा पुस २६ गतेदेखि वडा स्तरीय फुटबल प्रतियोगिता हुँदै

देवचुली। देवचुली नगरपालिकामा पुस २६ गतेदेखि वडा स्तरीय फुटबल प्रतियोगिता हुने भएको छ। देवचुली नगरपालिका युवा तथा खेलकुद विकास समितिको आयोजना र देवचुली ८ वडा युवा तथा खेलकुद विकास समितिको सह आयोजनामा पुस २६ गतेदेखि माघ ६ गतेसम्म देवचुली ७ को सेन्टर प्लट खेल मैदान रामबासमा प्रतियोगिता सुरु गर्न लागिएको हो।

प्रतियोगितामा पुरुषतर्फ देवचुली नगरपालिका भित्रका १६ वडाका १७ टिमबीच प्रतिष्पर्धा हुने खेल तालिकामा सार्वजनिक गरिएको छ। प्रतियोगितामा हरेक दिन दुई खेल खेलाइने नगर युवा तथा खेलकुद विकास समितिका अध्यक्ष चन्द्रबहादुर थापाले जानकारी दिए।प्रतियोगितामा पुस २६ देखि माघ २ गतेसम्म पहिलो चरणका खेलहरु,माघ ३ र ४ गते क्वाटर फाईनलका खेलहरु,माघ ५ गते सेमिफाइनलका खेलहरु र माघ ६ गते फाइनल खेल हुनेछ ।

प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको नगर युवा तथा खेलकुद विकास समितिका सचिव प्रकाश काफ्लेले बताए।