वडास्तरीय भलिबल प्रतियोगिता : पुरुषतर्फ देवचुली ९ र महिलातर्फ देवचुली १० लाई उपाधि

देवचुली। देवचुली नगरपालिकामा संचालित वडा स्तरीय भलिबल प्रतियोगिताको उपाधी पुरुषतर्फ देवचुली ९ र महिलातर्फ देवचुली १० ले जितेको छ । देवचुली नगरपालिका युवा तथा खेलकुद विकास समितिको आयोजना र देवचुली ५ वडा खेलकुद विकास समितिको सह आयोजनामा कदमपुर खेलमैदान देवचुली ५ देवीथानमा प्रतियोगिता भएको हो।

प्रतियोगितामा पुरुष तर्फ देवचुली ९ ले देवचुली १६ लाई हराउँदै उपाधि जितेको छ भने महिला तर्फ देवचुली १० ले देवचुली ९ लाई हराउँदै उपाधि जितेको छ। त्यसै गरि पुरुष तर्फ देवचुली ७ र महिला तर्फ देवचुली ८ तेस्रो भएका छन् ।प्रतियोगिताको उत्कृष्ट खेलाडी देवचुली ९ का चन्द्र थापा भएका छन् ।

प्रतियोगितामा पुरुषतर्फ प्रथम हुने देवचुली ९ ले नगद २० हजार रुपैयाँसहित मेडल,प्रमाणपत्र र ट्रफी प्राप्त गरेको छ भने उपबिजेता हुने देवचुली १६ ले नगद १२ हजार रुपैयाँसहित मेडल,प्रमाणपत्र र ट्रफी प्राप्त गरेको छ।त्यसै प्रतियोगितामा तृतीय हुने देवचुली ७ ले नगद ५ हजार रुपैयाँसहित मेडल,प्रमाणपत्र र ट्रफी प्राप्त गरेको छ ।महिलातर्फ बिजेता देवचुली १०, उप बिजेता देवचुली ९ र तेस्रो हुने देवचुली ८ ले नगद सहित मेडल,प्रमाणपत्र र ट्रफी प्राप्त गरेको छन् ।

देवचुली नगर युवा तथा खेलकुद विकास समितिका अध्यक्ष चन्द्रबहादुर थापाको अध्यक्षतामा भएको प्रतियोगिता समापन कार्यक्रम देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो। त्यसै गरि नगर उप प्रमुख पार्वता तिवारी, वडा सदस्यहरु,कार्यपालिका सदस्यहरु,विभिन्न संघसंस्थाका प्रतिनिधि लगायत खेलप्रेमीहरुको उपस्थिति रहेको थियो । प्रतियोगिताका बिजेता उपबिजेताहरुलाई नगर उप प्रमुखद्वारा पुरस्कार वितरण गरिएको थियो। समापन कार्यक्रमको सहजीकरण नगर खेलकुद विकास समितिका सचिव प्रकाश काफ्लेले गरेका थिए ।