वडास्तरीय भलिबल प्रतियोगिता : देवचुली ९ र देवचुली १६ फाइनल प्रवेश

देवचुली। देवचुली नगरपालिकामा संचालित वडा स्तरीय भलिबल प्रतियोगितामा शुक्रबार देवचुली ९ र देवचुली १६ विजयी हुँदै फाइनल प्रवेश गरेका छन्। देवचुली नगरपालिका युवा तथा खेलकुद विकास समितिको आयोजना र देवचुली ५ वडा खेलकुद विकास समितिको सह आयोजनामा कदमपुर खेलमैदान देवचुली ५ देवीथानमा प्रतियोगिता भएको हो।

प्रतियोगितामा देवचुली ९ ले देवचुली ७ लाई हराउँदै फाइनल प्रवेश गरेको छ भने देवचुली १६ ले देवचुली ५ लाई हराउँदै फाइनल प्रवेश गरेको छ। त्यसै गरि तेस्रो स्थानका लागि देवचुली ५ र देवचुली ७ बिच प्रतिष्पर्धा हुने नगर युवा तथा खेलकुद विकास समितिका सचिव प्रकाश काफ्लेले बताए । प्रतियोगितामा देवचुली १,देवचुली ४,देवचुली ५,देवचुली ७, देवचुली ८,देवचुली ९ र देवचुली १६ वडाका महिला भलिबल खेलाडी सहभागी रहेको र शनिबार महिला भलिबल प्रतियोगिता तर्फका सबै खेल गरिने आयोजकले जनाएको छ।

प्रतियोगितामा प्रथम हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद १२ हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा तृतीय हुने वडाले नगद ५ हजार रुपैयाँसहित मेडल,प्रमाणपत्र र ट्रफी प्राप्त गर्नेछ।प्रतियोगिताको उत्कृष्ट खेलाडीलाई नगद पुरस्कारको व्यवस्था रहेको छ। प्रतियोगिताको शनिबार २ बजेबाट समापन कार्यक्रम गर्ने आयोजकले तयारी गरेको छ।