नेपाली काँग्रेसका सभापति देउवासहितका शीर्ष नेताहरु देवचुली आउँदै

देवचुली। कांग्रेसका सभापति शेरबहादुर देउवासहित शीर्ष नेताहरु मंसिर ११ गते नवलपुरमा आयोजना हुने जिल्ला भेलालाई सम्बोधन गर्न देवचुली आउने भएका छन् । देवचुलीको सहारा पार्टी प्यालेसमा हुने कांग्रेस नवलपुरको प्रथम जिल्ला सम्मेलनमा सहभागी हुन सभापति शेरबहादुर देउवासहितका शीर्ष नेताहरु आउन लागेका हुन् ।

सम्मेलनबारे जानकारी दिन शनिबार आयोजित पत्रकार सम्मेलनमा कांग्रेस नवलपुरका जिल्ला सभापति महेन्द्रध्वज जिसीले केन्द्रीय सभापति देउवासहित महामन्त्री गगनकुमार थापा, विश्वप्रकाश शर्मा, केन्द्रीय सदस्य शेखर कोइराला, पूर्वमहामन्त्री तथा क्षेत्र नम्बर १ का सांसद शशांक कोइराला सहभागी हुने बताए ।सम्मेलनमा पार्टीको आन्तरिक गतिविधिसँगै जिल्लाको आर्थिक, सामाजिक र विकास निमार्णको विषयमा पनि छलफल हुने कार्यसूची छ ।

सम्मेलनको बन्द सत्रमा जिल्लाभरिका ९२ वडाका एक हजार नौ सय ७२ प्रतिनिधि सहभागी हुनेछन् भने खुला सत्रमा जिल्लाभरिका नेता कार्यकर्ता सहभागी हुने कांग्रेस नवलपुरले जनाएको छ ।