देवचुलीमा आँखा पाक्ने रोगको संक्रमण बढ्दै,सचेत रहन नगरपालिकाको अनुरोध

देवचुली।पछिल्लो समय देवचुली लगायत नवलपुरमा आँखा पाक्ने रोगको संक्रमण बढ्दै गएको छ । अत्याधिक गर्मी तथा वर्षातको समय रहेकाले यस रोग प्रकोपको रुप लिएको हो । रोगबाट बालबालिका, युवा, वृद्धवृद्धाहरु सबै प्रभावित भएका छन् ।

आँखा पाक्ने रोग फैलिएपछि अस्पतालमा बिरामीको भिड बढ्न थालेको छ ।केही दिनदेखि देवचुली नगर अस्पतालमा बिरामीको चाप बढेको छ । शुक्रबार देखि आँखाको समस्या लिएर आउने बिरामीको संख्या ४० भन्दा बढी रहेको र आइतबार ५० जना भन्दा बढी उपचारका लागि आएको देवचुली नगर अस्पतालका सूचना अधिकारी गणेश न्यौपानेले जानकारी दिनुभयो । यता संक्रमण फैलिएसंगै आवश्यक सतर्कता अपनाईएको देवचुली नगरपालिकाका स्वास्थ्य शाखा प्रमुख रामकुमार श्रेष्ठले बताउनुभयो ।

संक्रमण फैलिन थालेको थाहा पाउने बित्तिकै आवश्यक औषधि खरिद, जनचेतना अभिवृद्धि लगायतका काम तत्काल अघि बढाइएको देवचुली नगरपालिकाका नगर प्रमुख हरिप्रसाद न्यौपानेले बताउनुभयो । आँखा पाक्ने रोगका संक्रमित भेटिएपछि नगरपालिकाले आवश्यक सावधानी अपनाउन आग्रह गरेको छ । विशेषगरी बालबालिकामा बढी संक्रमण फैलिरहेको सन्दर्भमा विद्यालय संक्रमणको इपिसेन्टर हुन सक्ने भएकाले सावधानी अपनाउनुपर्ने उहाँको भनाई छ ।

दैनिक ८-१० जना विद्यार्थीहरुलाई आँखामा समस्या आएको भन्दै उनीहरुलाई बिदा दिइएको र सचेत रहनका लागि सबै विद्यार्थीहरुमा जानकारी गराइएको भीमसेन आदर्श माध्यमिक विद्यालयका सहायक प्रधानाध्यापक नवराज घिमिरेले बताउनुभयो ।

यस रोगको संक्रमण भएमा बढी भिडभाडमा नजाने, आँखा हातले नछुने, साबुनपानीले हात सफा गर्ने लगायतका सावधानी अपाउनुपर्ने स्वास्थ्यकर्मीहरुको भनाई छ । संक्रमण भएपछि आँखा चिलाउने, आँखा रातो हुने, पाक्ने र अत्याधिक दुख्ने समस्या देखिएको छ । अहिले फैलिएको संक्रमणले दृष्टिबिहीन नबनाए पनि आँखाको सेतो भागमा असर पार्न सक्ने भएकाले जोखिम भने रहेको चिकित्सकहरुले बताउने गरेका छन् । संक्रमण भएपछि औषधिले एक हप्ता सम्ममा निको हुने र कुनै जटिलता भएमा स्वास्थ्य संस्थामा सम्पर्क गर्न स्वास्थ्य शाखा प्रमुख श्रेष्ठले आग्रह गर्नुभयो।