पानीको स्रोत थप्दै नवलपुरको प्रगतिनगर खानेपानी

राजु चापागाई,देवचुली।खडेरीका कारण कतिपय स्थानमा खानेपानीको चरम अभाव भइरहँदा देवचुली नगरपालिकामा रहेको नेपाल कै उत्कृष्ट प्रगतिनगर खानेपानी तथा सरसफाइ उपभोक्ता संस्थाले आइतबारबाट पानीको स्रोत थप गरेको छ । खानेपानी संस्थाले सीताबासमा रहेको फिल्टर ट्यांकीमा २ इन्चको भुमिगत पानीको स्रोत थप व्यवस्थापन गरेको हो । पानीको स्रोत थप भएसँगै वितरणमा सहज हुने संस्थाले जनाएको छ ।

बढ्दो गर्मीसँगै पानीको मुहान सुकिरहँदा पानीको व्यवस्थापनका लागि खानेपानी संस्थाले विभिन्न स्रोतहरुको खोज गरिरहेको संस्थाका अध्यक्ष खिमानन्द भुसालले बताउनुभयो। `दुईदिनसम्म संस्थाका पदाधिकारी र कर्मचारीहरुको अहोरात्र खटाईले आज पानी थप गर्न सफल भएका छौं´ – भुसालले भन्नुभयो। उपभोक्तालाई पानीको अभाव हुन नदिन समिति र कर्मचारी निरन्तर काम गरिरहेको भुसालले बताउनुभयो। कतै पानीको चुहावट भए संस्थामा खबर गर्न र खानेपानीको सञ्चय गरेर राख्नका लागि समेत उनले उपभोक्तालाई आग्रह गर्नुभयो । `प्रति व्यक्ति दैनिक १५० लिटर अधिकतम उपलब्ध गराउँदा पानी पर्याप्त हुन्छ भन्ने मान्यता छ तर निर्माणका काम , करेसाबारी र धानकाे बिउमा समेत खानेपानी प्रयाेग भएकाेले दैनिक ६० लाख लिटर वितरण हुँदा पनि कतिपय ठाउँमा पानी कम भएकाे, छतमा नचढेकाेलगायत समस्या र गुनासाे आएकाेले स्राेत थप गरिएकाे हाे´-अध्यक्ष भुसालले भन्नुभयो ।

सेवा क्षेत्रभित्र चोबिसै घण्टा पानी वितरण गर्ने खानेपानी संस्थाले खडेरीका कारण पानी कम भएकाले पानीको सही सदुपयोग गर्न उपभोक्तालाई सचेत गराएको संस्थाका सचिव इन्द्रमणी भुसालले बताए । उपभोक्तालाई संस्थाको फेसबुक पेजबाट निरन्तर सूचना दिँदै पानीको उचित प्रयोगका लागि अनुरोध गरिएको उहाँले बताउनुभयो ।

प्रगतिनगर खानेपानी तथा सरसफाइ उपभोक्ता संस्थाले ५२ सय धारामार्फत देवचुली नगरपालिकाको आधा जनसंख्याका भन्दा बढीका लागि खानेपानी वितरण गरेको छ । संस्थाले देउसत खोलाको मुहानको पानीसँगै ५ वटा बोरिङबाट निरन्तर खानेपानी प्रवाह गर्दै आइरहेको छ । देवचुली नगरपालिकामा ५८ हजार ३ जनसंख्या रहेको छ भने प्रगतिनगर खानेपानीका उपभोक्ता ३० हजार छन् ।