एमाले नवलपुर चुनाव अभियानमा लाग्यो ,क्षेत्र नम्बर १( ख) ले बनायो निर्वाचन परिचालन कमिटि

देवचुली।नेकपा( एमाले) नवलपुर प्रदेश सभा निर्वाचन क्षेत्रिय समन्वय कमिटिले २०७९ मंसिर ४ गते हुने प्रतिनिधि सभा तथा प्रदेश सभा सदस्यको निर्वाचनका लागि निर्वाचन परिचालन कमिटि गठन गरेको छ । आज( शनिवार) दलदलेमा भएको कमिटिको तेस्रो बैठकले उक्त निर्णय गरेको क्षेत्रिय समन्वय कमिटिका सचिव एवम् युवा नेता विद्रोही गिरीले जानकारी दिनुभयो ।

बैठकले प्रदेश सभा निर्वाचन क्षेत्रिय समन्वय कमिटिका संयोजक होमनाथ जैंसीको संयोकत्वमा सह संयोजकहरुमा दीपकराज लम्साल, युवराज वाग्ले, दिपकचन्द्र बस्ताकोटी र सचिवमा विद्रोही गिरी रहने गरी क्षेत्र १ (ख) भित्रका जिल्ला कमिटिका सचिवालय सदस्य, जिल्ला सदस्य, जिल्ला सल्लाहकार, पालिका पदाधिकारी, सदस्यहरु, जनवर्गीय संगठनका केन्द्रीय सदस्य, पेशागत निकाय, जिल्ला पदाधिकारी वडाअध्यक्षहरु रहने निर्वाचन परिचलान कमिटि गठन गरेको छ ।

बैठकले क्षेत्रिय समन्वय कमिटिका सचिव विद्रोही गिरीको संयोजकत्वमा १००१ सदस्यीय निर्वाचन प्रचार प्रसार कमिटि गठन गरेको छ । जसको सह संयोजकहरुमा धर्मदत्त भुसाल, कृष्णबहादुर नेपाली, तवारक अहमद मियाँ,राजेन्द्रप्रसाद पाण्डे रहनुभएको छ । प्रचार कमिटिमा क्षेत्रिय समन्वय कमिटिका सबै, पालिका कमिटिका सवै, जनवर्गीय संगठनका केन्द्र, प्रदेश र जिल्लाका पदाधिकारी, जनसंगठनका पालिका कमिटिका सबै प्रेस चौतारीसंग आबद्ध सबै, वडा कमिटीका पदाधिकारी र सदस्यहरु, टोल कमिटिका अध्यक्ष र पदाधिकारी सबै रहने कमिटि निर्माण गरिएको छ ।

त्यसैगरी आर्थिक ब्यवस्थापन समितिमा क्षेत्रिय समन्वय कमिटिका सह संयोजक गणेश प्रसाद सापकोटा संयोजक र सहसंयोजकहरुमा नरदेव न्यौपाने, खिमानन्द भुसाल, यममाया राना र एक जना पछि थप गर्ने गरी निर्णय भएको संयोजक होमनाथ जैंसीले बताउनुभयो ।

युवा , विद्यार्थी, र महिलाहरुको भेला गरी युवा, विद्यार्थी र महिलाहरु परिचालन कमिटि निर्माण गर्ने बैठकले निर्णय गरेको छ । बैठकमा एमालेका केन्द्रीय सदस्य एवम् जिल्ला सह इञ्चार्ज कृष्ण पौडेल, केन्द्रिय सल्लाहकार कमिटि सदस्य दिपक अधिकारी, एमाले जिल्ला अध्यक्ष मुक्तिराम पाण्डे, क्षेत्रिय समन्वय कमिटि क्षेत्र नं. १ का संयोजक नारायणप्रसाद तिमिल्सेना लगायतले शुभकामना मन्तव्य राख्नुभएको थियो ।