‘प्रविधि उमेर समूहका किशोरी’ परियोजनाको बारेमा छलफल

ज्ञानु पंगेनी,कावासोती ।‘टेक्नोलोजी एज गर्ल (ट्याग) अर्थात् ‘प्रविधि उमेर समूहका किशोरी’ परियोजनाको बारेमा सरोकारवालाहरुसंग छलफल कार्यक्रम आईतबार कावासोती १६ डण्डामा भएको छ ।
अग्यौली सामुदायीक श्रोत पुस्तकालयको आयोजना तथा रिड नेपालको सहयोगमा सञ्चालित यस परियोजनाका बारेमा जानकारी दिने उदेश्यले आयोजना गरिएको छलफल कार्यक्रममा ट्याग परियोजना संयोजक रुपा भट्टराईले भए गरेका कार्यक्रमहरु , उपलब्धी , चुनौती तथा भावि कार्यक्रमका बारेमा जानकारी गराउनुभएको थियो । उहाँले परियोजना अन्तरगत नेतृत्व, प्रविधि सम्बन्धि आधारभुत र एडभान्स तालिम,लैंगिक समानता तथा सामाजिक समाबेशिकरण सम्बन्धि तालिम , दोस्रो चरणको लागि २७ जना किशोरीहरुको छनौट , समुदायको आवश्यकताको पहिचान, विभिन्न संघसंसस्थामा आबद्ध व्यक्तिहरुसँग अन्तर्वार्ता , रेडियो कार्यक्रम , मनोपरामर्शकर्तासँगको अन्तरक्रिया कार्यक्रम भएको बताउनुभयो । यस्तै , कोभिड संक्रमणको समयमा राहत वितरण, शैक्षिक सामाग्री बितरण , ट्याग कशोरीहरुद्धारा समुदायमा मास्क वितरण , ट्याग सहभागीहरुको १५ दिने समिक्षा कार्यक्रम , मेन्टरद्वारा लैंगिक समानता र समाजिक समावेशीकरण तालिम , अभिभावकसंग अन्तरक्रिया कार्यक्रम , किशोरी नेतृत्व उप– समिति गठन लगातयका कार्यक्रम भएको जानकारी दिनुभयो ।
परियोजनाले किशोरीहरुमा समय व्यवस्थापन , नेतृत्व विकास , प्रविधिको सिप हासिल, विभिन्न संघसंस्थासंग समन्वय गर्ने , आवश्यकता अनुसार स्रोतको प्रयोग गर्ने , बजेट व्यवस्थापन , समुदायको आवश्यकता पहिचान गर्ने तथा सामाजिक सञ्जालको सदुपयोग गर्ने क्षमताको विकास भएको बताउनुभयो ।
यस्तै उहाँले परियोजनाका लागि पहिलो चरणमा चार लाख , ५६ हजार ३ सय ५० , दोश्रो चरणमा सात लाख , २१ हजार , ५४९ र तेश्रो चरणमा दुई लाख , ४१ हजार ६ सय रुपिँया बजेट आएको बताउनुभयो ।
छलफलका क्रममा किशोरी सहभागि भएका विद्यालयका शिक्षकहरुले ट्याग परियोजनामा आबद्ध भएका किशोरीहरुमा आत्मविश्वास बढेको बताउनुभएको थियो । कार्यक्रममा सहभागी नहुँदा आफ्नो नाम पनि भन्न डराउने किशोरीहरु अहिले मासमा नै उभिएर निर्धक्कसंग बोल्न सक्ने भएको बताउनुभएको थियो । परियोजनाले प्रविधीमा किशोरीको पहुँच वृद्धि गराउनुका साथै आत्मनिर्भर बन्नका लागि समेत भूमिका निर्वाह गरेको अन्य सहभागी सरोकारवालाहरुले बताउनुभयो ।
अग्यौली सामुदायीक श्रोत पुस्तकालयका अध्यक्ष सूर्य पाण्डेको अध्यक्षतामा कार्यक्रम भएको थियो । कार्यक्रममा कावासोती नगरपालिका महिला ,बालबालिका तथा जेष्ठ नागरिक शाखाकी महिला विकास अधिकृत शुसिला तिमिल्सीना , वडा नं १६ का वडा सदस्य आनन्द श्रेष्ठ , पुस्तकालयका सचिव बद्रीनाथ नेपाल , क्रियाशील पत्रकार महिला नवलपुर अध्यक्ष ज्ञानु पंगेनी , लिला भण्डारी लगायतका सरोकारवालाहरुको सहभागिता रहेको थियो ।
कार्यक्रममा बोल्दै अग्यौली सामुदायीक श्रोत पुस्तकालयका अध्यक्ष पाण्डेले पहिचो चरण अन्तरगत ५० जना किशोरीहरुलाई १७ हप्तासम्म दैनिक जिवनमा आवश्यक पर्ने कम्युटर सम्बन्धि ज्ञान र शिप सिकाईएको बताउनुभयो । विषेश गरि किशोरीहरुलाई सुचना प्रविधिको पहुँचमा वृद्धि गर्दै यसको सही प्रयोगबाट हुने सकारात्मक फाईदा र यसलाई प्रयोग गर्ने नाममा दुरुपयोग बढ्दा जीवनमा हुन सक्ने नकारात्मक बेफाइदाका बारेमा तालिम मार्फत् जानकारी दिदै सजग र सचेत बनाएर उनीहरुका माध्यमबाट फेरी समुदायमा यी कुराको चेतना अभिबृद्धि गर्ने काम गरिएको बताउनुभयो ।
अग्यौली सहित देशभरका १० वटा पुस्तकालयमा सञ्चालन गरिएको यस परियोजनाले किशोरीहरुको समग्र विकासमा टेवा पुर्‍याउने लक्ष्य लिएको उहाँले बताउनुभयो । कार्यक्रममा मदन गिरीले सहजीकरण गर्नुभएको थियो ।