काठमाडौंको वायु प्रदूषण चर्किंदै, नागरिकको स्वास्थ्य जोखिममा: गैसस महासंघ नेपाल

काठमाडौं । पछिल्ला केही दिनयता काठमाडौं उपत्यका विश्वकै सबैभन्दा प्रदूषित सहरहरूमा पहिलो स्थानमा पुगेको छ। वायु गुणस्तर सूचकांक (AQI) अनुसार, काठमाडौंको वायुमा PM2.5, PM10 र ग्यासीय प्रदूषक अत्यधिक मात्रामा फेला परेको छ, जुन विश्व स्वास्थ्य संगठन (WHO) को मापदण्डभन्दा धेरै गुणा बढी हो।

गैरसरकारी संस्था महासंघ नेपाल (गैसस महासंघ) ले यस अवस्थाप्रति गम्भीर ध्यानाकर्षण गराउँदै नागरिकको स्वास्थ्य जोखिम बढेको जनाएको छ। विशेष गरी बालबालिका, गर्भवती महिला, ज्येष्ठ नागरिक, दीर्घरोगी र कमजोर व्यक्तिहरूलाई वायु प्रदूषणले गम्भीर असर पार्ने महासंघको भनाइ छ।

महासंघले सरकारलाई तत्काल प्रभावकारी योजना ल्याई वायु प्रदूषण नियन्त्रण गर्न आग्रह गरेको छ। नेपालको संविधानको धारा ३० ले नागरिकलाई स्वच्छ वातावरणमा बाँच्ने अधिकार सुनिश्चित गरेको भन्दै महासंघले कानुनी व्यवस्थाको प्रभावकारी कार्यान्वयन आवश्यक रहेको उल्लेख गरेको छ।

साथै, महासंघले आम नागरिक, संघसंस्था, र सरकारलाई वातावरणमैत्री गतिविधिहरूलाई प्राथमिकता दिन समेत अनुरोध गरेको छ।