नवलपुरमा गणतन्त्रको पक्षमा नेकपा एमालेको जागरणसभा

कावासोती । संघीय लोकतान्त्रिक गणतन्त्रको पक्षमा नेकपा एमाले नवलपुरले सोमबार जिल्लास्तरीय जागरण सभा गरेको छ । जिल्लाको विभिन्न स्थानबाट जागरणसभामा सहभागी हुन डण्डा आएका पार्टी कार्यकर्तालाई एमालेका केन्द्रीय सदस्यहरुले सम्बोधन गर्नु भएको थियो ।

सभालाई सम्बोधन गर्दै एमाले केन्द्रीय सदस्य एवम् नवलपुर इञ्चार्ज तिलक महतले नेपाली जनताको लामो बलिदानीपूर्ण इतिहासबाट प्राप्त गणतन्त्रमाथि कुनैपनि पक्षबाट हुने आक्रमण स्वीकार्य नहुने बताउनुभयो । उहाँले गणतन्त्रको स्थापना पस्चात नेपाली जनताहरुले प्राप्त गरेको अधिकार, उपभोग गरेको विकास र समृद्धि महत्वपूर्ण रहेको बताउनुभयो । गणतन्त्रको विकल्प गणतन्त्र नै हुने भन्दै महतले गणतन्त्रको विकल्प राजतन्त्र हुन नसक्ने बताउनुभयो । जनताको शासनबाट व्यक्तिको शासन तर्फ जाने कुरा कल्पना बाहिरको विषय भएको भन्दै उहाँले अबको यात्रा समृद्धिको यात्रा भएको बताउनुभयो ।

एमाले केन्द्रीय सदस्य कृष्ण पौडेलले नेपालमा विभिन्न समयमा भएका राजनितिक परिवर्तनबाट हालको संघीय लोकतान्त्रिक गणतन्त्र स्थापना भएको भन्दै अब जनताको जनजिवन परिवर्तनका लागि राजनिति केन्द्रीत बन्नु पर्ने बताउनुभयो । कतिपय अवस्थामा जनतामा नैरश्यता पैदा भएपनि त्यसको सहि सम्बोधन हालको राजनितिक व्यवस्थाबाट मात्रै सम्भव भएको बताउनुभयो । नेपाल जनतामाथि विभिन्न समयमा विभिन्न शक्तिहरुले निरङकुशता लाद्ने र जनतालाई दास बनाउन खोज्नेहरु प्रवृत्तिहरु देखिने गरेको स्मरण गर्दै उहाँले ति सबै किसिमका प्रतिगमनहरु जनताले असफल बनाउने बताउनुभयो ।

एमाले केन्द्रीय सदस्य रविन्द्र अधिकारीले राजावादीहरुले चैत्र १५ गते गरेको उदण्डताले उनिहरुको मनस्थिति र उनिहरुको कार्यशैली जनतालाई बुझिसकेको बताउनुभयो । व्यक्ति हत्या, नीजि तथा सार्वजनिक सम्पती माथिको लुटपाट र क्षति जस्ता कार्यको भत्सर्ना गर्दै उहाँले एमालेका प्रत्येक कार्यकर्ताले गणतन्त्रको पक्षमा बस्तीबस्ती सम्म जागरण चलाउनुभयो ।

एमाले नवलपुर अध्यक्ष जीवन श्रेष्ठको अध्यक्षतामा भएको जागरण सभामाले जिल्लाको सबै स्थानीय तहबाट एमाले कार्यकर्ताहरु सहभागी भएको एमाले जिल्ला सचिव भीमलाल कण्डेलले बताउनुभयो । एमालेले अहिले विभिन्न चरणमा जागरण तथा जरा अभियान सञ्चालन गर्दै आएको छ ।