देवचुलीमा दोस्रो उपमेयर कप भलिबल प्रतियोगिता हुने

देवचुली । देवचुली नगरपालिका वडा नम्बर ८ मा दोस्रो उपमेयर कप भलिबल प्रतियोगिता हुने भएको छ । देवचुली नगरपालिका युवा तथा खेलकुद विकास समितिको आयोजना तथा युवा तथा खेलकुद विकास समिति देवचुली ८ को सह-आयोजनामा देवचुली-८ वडा कार्यालय भवन नजिकैको मैदानमा चैत्र १८ गतेदेखि २० गतेसम्म प्रतियोगिता सुरु गर्न लागिएको हो । प्रतियोगितामा पुरुष तथा महिला तर्फ देवचुली नगरपालिकाका वडाका खेलाडीबीच प्रतिष्पर्धा हुने आयोजकले जनाएको छ।

प्रतियोगितामा पुरुषतर्फ प्रथम हुने वडाले नगद ३५ हजार रुपैयाँसहित मेडल, प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल, प्रमाणपत्र र ट्रफी प्राप्त गर्नेछ। प्रतियोगितामा महिलातर्फ प्रथम हुने वडाले नगद ११ हजार रुपैयाँसहित मेडल, प्रमाणपत्र र ट्रफी प्राप्त गर्नेछ भने उपबिजेता हुने टिमले नगद ७ हजार रुपैयाँसहित मेडल, प्रमाणपत्र र ट्रफी प्राप्त गर्नेछ । प्रतियोगिताको उत्कृष्ट खेलाडीलाई नगद पुरस्कारको व्यवस्था रहेको देवचुली नगरपालिका युवा तथा खेलकुद विकास समितिका अध्यक्ष दिपकचन्द्र भट्टराईले जानकारी दिए । खेलमा टिम दर्ताका लागि २ हजार रुपैयाँ लाग्ने र चैत १७ गते बेलुका ५ बजेसम्म टिम दर्ता गर्न सकिने आयोजकले जनाएको छ ।