देवचुली खानेपानीको नयाँ नेतृत्व चयनका लागि निर्वाचन सम्पन्न, आजै मतगणना हुने

देवचुली । देवचुली खानेपानी तथा सरसफाइ उपभोक्ता संस्था देवचुली ७, ८ र ९ को नयाँ नेतृत्व चयनका लागि भएको निर्वाचन सम्पन्न छ । संस्थाको १५ पदका लागि ३२ जना उम्मेदवारहरु प्रतिष्पर्धामा रहेका छन् । बिहान ९ बजेबाट भीमसेन माविको आधारभूत ब्लकमा सुरु भएको निर्वाचन दिउँसो ४ बजेसम्म संचालन भएको थियो ।

१२५३ जना मतदाता रहेको देवचुली खानेपानी तथा सरसफाइ उपभोक्ता संस्थाको निर्वाचनमा ८५९ मत खसेको छ । शनिबार भएको निर्वाचनमा कुल मतदाताको ६८.३९ प्रतिशत मत खसेको हो। मतगणना केही समय पछि सुरु गरिने निर्वाचन समितिले जनाएको छ ।

संस्थाको अध्यक्षका लागि ढकलाल काफ्ले, कृष्णबहादुर क्षेत्री र बलराज बिक प्रतिष्पर्धामा रहेका छन् । संस्थाको उपाध्यक्ष पदका लागि बिनु गुरुङ र नन्दकला केसी, सचिवमा कृष्णबहादुर बिक र यमप्रसाद भुसाल, कोषाध्यक्षमा रिलकुमारी तामाङ र शेरबहादुर राना उम्मेदवार रहेका छन् । त्यसै गरि तिनकन्या टोलबाट सदस्यका लागि कमला राना र बिर्खमाया लुंगेली, फुलबारी टोलबाट सदस्यका लागि तिलामाया अधिकारी र बुद्धिमाया थापा, कालिका टोलबाट सदस्यका लागि दधिराम पाण्डे र गंगाबहादुर भट्टराई, हरियाली टोलबाट सदस्यका लागि चन्द्रमाया पौडेल ( खनाल) र तारा खनाल, सिद्धी विनायक टोलबाट सदस्यका लागि नारद मणि पाण्डे र लालबहादुर बाचे मगर `क´, मिलन टोलबाट सदस्यका लागि शर्मिला तामाङ र रनबहादुर राना मगर, लालीगुरास टोलबाट सदस्यका लागि कमला खरेल र कमला रेग्मी, प्रगति टोलबाट सदस्यका लागि आश पुरे कामी, शर्मिला बराल र यम श्रेष्ठ, भीमसेन टोलबाट सदस्यका लागि गंगादेवी फाल मगर र दिलबहादुर तामाङ उम्मेदवार रहेका छन् ।

संस्थाको लेखा समितिको संयोजकमा भीमबहादुर श्रेष्ठ निर्विरोध निर्वाचित भएका छन् भने लेखा समिति खुला सदस्यमा रुद्रप्रसाद सुवेदी र अनिता कामी साथै महिला सदस्यमा देवीमाया बिक र चन्द्रमाया बाचे मगर उम्मेदवार रहेका छन् । संस्थाको निर्वाचनबाट अध्यक्ष, उपाध्यक्ष, सचिव, कोषाध्यक्ष र प्रत्येक टोलबाट १/१ जना सदस्य चयन गरिने र लेखा समितिको संयोजक सहित २ जना सदस्य चयन हुने निर्वाचन समितिका संयोजक जीवलाल श्रेष्ठले जानकारी दिनुभयो ।