दोस्रो वडास्तरीय टि २० क्रिकेट प्रतियोगिता: देवचुली १५ र देवचुली १७ फाइनल प्रवेश

देवचुली । देवचुली नगरपालिकामा संचालित दोस्रो वडास्तरीय टि २० क्रिकेट प्रतियोगितामा मंगलबार भएको खेलबाट देवचुली १५ र देवचुली १७ विजयी हुँदै फाइनल प्रवेश गरेका छन् । देवचुली नगर युवा तथा खेलकुद विकास समितिको आयोजनामा माघ २ गतेबाट देवचुली १० मा रहेको रोयल क्रिकेट एकेडेमीको खेलमैदानमा प्रतियोगिताको संचालन गरिएको हो ।

प्रतियोगितामा मंगलबार देवचुली १३ का विरुद्ध देवचुली १७ बिचको पहिलो खेलमा देवचुली १७ ले ४८ रनको जित निकाल्दै फाइनल प्रवेश गरेको छ । पहिले ब्याटिङ गरेको देवचुली १७ ले शिशिर लामिछानेको २५ रन र सरोज पौडेलको २३ रनको मदतले २० ओभरमा ८ विकेट गुमाउँदै ११९ रन बनाएको थियो । बलिङ तर्फ देवचुली १३ का आयुष सुबेदीले ३ विकेट र ओमचन्द्र महतोले २ विकेट लिएका थिए ।

१२० रनको विजयी लक्ष्य लिएर मैदान छिरेको देवचुलीले १३ ले १४.३ ओभरमा १० विकेट गुमाउँदै ७१ रन बनाउँदै ४८ रनले हारेको हो । देवचुली १३ का प्रमिश अर्यालले २५ रन र सुरज पौडेलले १३ रन बनाएका थिए। बलिङ तर्फ देवचुली १७ का सरोज पौडेलले ५ विकेट र शिशिर लामिछानेले २ विकेट लिएका थिए । प्रतियोगितामा देवचुली १७ का सरोज पौडेल म्यान अफ दि म्याच भएका थिए।

त्यसै गरि प्रतियोगिता अन्तरगत मंगलबार देवचुली १५ का विरुद्ध देवचुली १६ बीचको खेलमा देवचुली १५ ले ५३ रनको जित निकालेको छ । पहिले ब्याटिङ गरेको देवचुली १५ ले सन्देश भुसालको ३० रन र स्विकार श्रेष्ठको २७ रनको मदतले २० ओभरमा ७ विकेट गुमाउँदै १३३ रन बनाएको थियो । बलिङ्तर्फ देवचुली १६ का शिवम शर्माले ३ विकेट र विजय सिग्देलले २ विकेट लिएका थिए ।

१३४ रनको विजयी लक्ष्य लिएर मैदानमा प्रवेश गरेको देवचुली १६ ले २० ओभरमा १० विकेट गुमाई ८० रन बनाउँदै ५३ रनको हार भएको थियो । देवचुली १६ का कुनाल बस्नेतले २४ रन र रितकुमार लुइँटेलले १४ रन बनाएका थिए । बलिङतर्फ देवचुली १५ का सागर जिसीले ३ विकेट र रितेश श्रेष्ठले २ विकेट लिएका थिए । प्रतियोगितामा देवचुली १५ का स्विकार श्रेष्ठ म्यान अफ दि म्याच भएका थिए ।

नगरका १३ वडाबाट सहभागिता रहेको प्रतियोगितामा प्रथम हुने टिमले नगद ३५ हजार रुपैयाँसहित मेडल र ट्रफी प्राप्त गर्नेछ भने द्वितीय हुने टिमले नगद २० हजार रुपैयाँसहित मेडल र ट्रफी प्राप्त गर्नेछ । त्यसै गरि सेमिफाइनलमा पुग्ने टिमले ६ हजार ५ सय रुपैयाँ प्राप्त गर्नेछन् । प्रतियोगिता अन्तरगत बुधबार देवचुली महिला क्रिकेट टिम र मुन स्टोन स्पोर्ट्स एकेडेमी भरतपुरबीच मैत्रीपुर्ण खेल हुने र देवचुली १५ का विरुद्ध देवचुली १७ बिच बिहीबार फाइनल खेल हुने आयोजकले जानकारी दिए ।