देव प्रगति युवा समाजद्वारा फुटबल खेलको आम्दानी खर्च सार्वजनिक

देवचुली । देव प्रगति युवा समाजद्वारा फुटबल खेलको आम्दानी खर्च सार्वजनिक गरेको छ । क्लबले गत असोज ९ गतेदेखि २२ गतेसम्म भीमसेन आदर्श माविको खेल मैदानमा संचालन भएको प्रथम सेन्ट्रल कलेज सेभेन ए साइड फुटबल प्रतियोगितामा भएको आम्दानी खर्चको हिसाब सोमबार सार्वजनिक गरिएको हो ।

देव प्रगति युवा समाजका अध्यक्ष त्रिलोचन पराजुलीको अध्यक्षता भएको आम्दानी खर्च सार्वजनिक कार्यक्रममा देवचुली ७ का वडा अध्यक्ष भुमिसरा थापाको प्रमुख आतिथ्यता रहेको थियो । त्यसै गरि देवचुली ९ का वडा अध्यक्ष बलिराम सापकोटा, देवचुली ११ का वडा सदस्य डम्बर बहादुर सिंजाली लगायत स्थानीयको उपस्थिति रहेको थियो ।

फुटबल प्रतियोगिता संचालनका लागि विभिन्न संघसंस्था, व्यक्तिहरुबाट ६ लाख ६४ हजार २१४ रुपैयाँ आम्दानी भएको र ३ लाख ५ हजार ६० रुपैयाँँ खर्च भएको क्लबका अध्यक्ष त्रिलोचन पराजुलीले जानकारी दिनुभयो । खेलबाट बचत भएको रकमलाई सामाजिक कार्यमा खर्च गरिने उहाँले बताउनुभयो ।

खेल संचालन गरेर हिसाब किताब सार्वजनिक गरी पारदर्शिता प्रस्तुत गरेकोमा देव प्रगति युवा समाजलाई धन्यवाद ज्ञापन गर्दै क्लबको सक्रियताले समाजमा विभिन्न अभियान संचालन गर्न सजिलो हुने देवचुली ७ का वडा अध्यक्ष भुमिसरा थापाले बताउनुभयो । देवचुली नगरपालिकाको तीन वटा वडा ( देवचुली ७, देवचुली ९ र देवचुली ११) मा पर्ने देव प्रगति समाजले आगामी दिनमा गर्ने कार्यक्रमहरुमा समेत वडा कार्यालयबाट सक्दो सहयोग गर्ने उहाँले बताउनुभयो ।

देवचुली ७ मा रहेको राधाकृष्ण मन्दिरको प्राङ्गणमा भएको हिसाब सार्वजनिक कार्यक्रममा सहजीकरण देव प्रगति समाजका संस्थापक अध्यक्ष भुमिलाल लामिछानेले गर्नुभएको थियो ।