सातौं नगर स्तरीय फुटबल प्रतियोगिता : सोमबार कावासोती ४ र कावासोती १७ विजयी

नवलपुर । कावासोती नगरपालिकाको वडा नम्बर १ मा संचालित सातौं कावासोती नगर स्तरीय फुटबल प्रतियोगितामा सोमबार कावासोती ४ र कावासोती १७ विजयी भएका छन् । कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा संचालित प्रतियोगिता अन्तरगत सोमबारको भएको पहिलो खेलमा कावासोती ४ विजयी भएको हो ।

कावासोती ४ ले कावासोती २ लाई ४-० गोल अन्तरले हराउँदै दोस्रो चरणमा प्रवेश गरेको हो । पहिलो खेलमा कावासोती ४ का रविन महतो म्यान अफ दि म्याच भएका थिए । त्यसैगरी सोमबार नै भएको कावासोती १३ र कावासोती १७ बिचको खेलमा कावासोती १७ विजयी भएको छ । कावासोती १७ ले कावासोती १३ लाई ४-३ गोल अन्तरले हराउँदै दोस्रो चरणमा प्रवेश गरेको हो । दोस्रो खेलमा कावासोती १७ का महेश बिक म्यान अफ दि म्याच भएका थिए । प्रतियोगितामा मंगलबार पहिलो खेल कावासोती ३ का विरुद्ध कावासोती ५ र दोस्रो खेल कावासोती १ का विरुद्ध कावासोती ११ बीच हुने आयोजकले जनाएको छ ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने वडाले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद ३० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ। प्रतियोगिताको सेमिफाइनल पुग्ने दुई टिमले १०/१० हजार रुपैयाँ पाउनेछन् । त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सवोकृष्ट गोलरक्षकलाई पुरस्कारको व्यवस्था रहेको कावासोती नगर खेलकुद विकास समितिका अध्यक्ष ध्रुव खनालले जानकारी दिनुभयो ।