सातौं नगर स्तरीय फुटबल प्रतियोगिता : शनिबार कावासोती ६ र कावासोती १४ विजयी

नवलपुर । कावासोती नगरपालिकाको वडा नम्बर १ मा संचालित सातौं कावासोती नगर स्तरीय फुटबल प्रतियोगितामा शनिबार कावासोती ६ र कावासोती १४ विजयी भएका छन् । कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा संचालित प्रतियोगिता अन्तरगत शनिबार भएको पहिलो खेलमा कावासोती ६ विजयी भएको हो ।

कावासोती ६ ले कावासोती १० लाई ४-२ गोल अन्तरले हराउँदै दोस्रो चरणमा प्रवेश गरेको हो । त्यसैगरी शनिबार नै भएको कावासोती १२ र कावासोती १४ बिचको खेलमा कावासोती १४ विजयी भएको छ । कावासोती १४ ले कावासोती १२ लाई ट्राइबेकरमा ३-१ गोल अन्तरले हराउँदै दोस्रो चरणमा प्रवेश गरेको हो । निर्धारित समयको खेलमा दुवै टिमबाट १/१ को बराबरी गोल भएपछि खेल ट्राइबेकरमा गएको थियो ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने वडाले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद ३० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ । प्रतियोगिताको सेमिफाइनल पुग्ने दुई टिमले १०/१० हजार रुपैयाँ पाउनेछन् । त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सवोकृष्ट गोलरक्षकलाई पुरस्कारको व्यवस्था रहेको कावासोती नगर खेलकुद विकास समितिका अध्यक्ष ध्रुव खनालले जानकारी दिनुभयो । प्रतियोगितामा आइतबार पहिलो खेल कावासोती ८ का विरुद्ध कावासोती ९ र दोस्रो खेल कावासोती १५ का विरुद्ध कावासोती १६ बीच हुने आयोजकले जनाएको छ ।