सातौं वडास्तरीय नाइन ए साइड फुटबल प्रतियोगिता : देवचुली ११ सेतो क्वाटरफाइनल प्रवेश

देवचुली । देवचुली नगरपालिका वडा नम्बर ११ मा संचालित सातौं वडास्तरीय नाइन ए साइड फुटबल प्रतियोगितामा शुक्रबार देवचुली ११ सेतो विजय भएको छ । पृथ्वी समाज सेवा क्लबको ३१ औं वार्षिकोत्सव एवम् स्व. रामवीर पुलामीको स्मृतिमा पृथ्वी समाज सेवा क्लबको आयोजनामा देवचुली ११ को सुर्य किरण आधारभूत विद्यालयको खेलमैदानमा संचालन भएको देवचुली २ का विरुद्ध देवचुली ११ सेतो बिचको खेलमा देवचुली ११ सेतो विजयी भएको हो ।

देवचुली ११ सेतोले देवचुली २ लाई ३-१ गोल अन्तरले हराउँदै क्वाटर फाइनलमा प्रवेश गरेको हो । खेलमा देवचुली ११ सेतोका समीर श्रेष्ठले २ गोल र इसक बिकले १ गोल गरेका थिए भने देवचुली २ का विजय राईले गोल गरेका थिए । आजको खेलमा देवचुली ११ सेतोका समीर श्रेष्ठ म्यान अफ दि म्याच भएका छन् । प्रतियोगिता अन्तरगत शनिबार देवचुली ११ रातोका विरुद्ध देवचुली १४ बीच पहिलो खेल र  देवचुली ४ का विरुद्ध देवचुली १३ बिच दोस्रो खेल हुने आयोजकले जनाएको छ ।

देवचुली नगरपालिकाका १६ टिमको सहभागिता रहेको प्रतियोगितामा प्रथम हुने टिमले नगद ६१ हजार १ सय ११ रुपैयाँसहित मेडल, ट्रफी र प्रमाणपत्र प्राप्त गर्नेछ भने द्वितीय हुने टिमले नगद ३५ हजार ५ सय ५५ रुपैयाँँ सहित मेडल, ट्रफी र प्रमाणपत्र प्राप्त गर्नेछ । त्यसै गरि प्रतियोगिताका उत्कृष्ट खेलाडी, सर्वोकृष्ट गोलरक्षक र सर्वाधिक गोलकर्तालाई पुरस्कारको व्यवस्था रहेको आयोजक क्लबका अध्यक्ष बुद्धिबहादुर लुंगेलीले जानकारी दिनुभयो ।