वडास्तरीय खुला भलिबल प्रतियोगिता : सोमबार राईकोट, मुण्डे र बाह्रकोल विजयी

देवचुली । देवचुली ७ मा संचालित वडास्तरीय खुला भलिबल प्रतियोगितामा सोमबार राईकोट, मुण्डे र बाह्रकोल विजयी भएका छन् । वडा खेलकुद विकास समिति देवचुली ७ को आयोजना, देवचुली ७ वडा कार्यालयको सहकार्य र नगर युवा तथा खेलकुद विकास समितिको समन्वयमा देवचुली ७ मा रहेको लालीगुँरास युवा क्लबको प्राङ्गणमा मंसिर १५ गतेदेखि संचालित वडास्तरीय खुला भलिबल प्रतियोगितामा सोमबार तीन खेल सम्पन्न भएका हुन् ।

सोमबार भएको दोस्रो चरणका खेल अन्तरगत पहिलो खेलमा राईकोटले भागरलाई २-१ को सेटले जित निकालेको थियो भने दोस्रो खेलमा मुण्डेले फारामलाई २- १ को सेटले नै हराएको थियो । त्यसै गरि बाह्रकोलले बरौलीलाई २-१ को सेटले हराएको वडा खेलकुद विकास समिति देवचुली ७ का अध्यक्ष मनिष आले मगरले जानकारी दिए ।

१३ टिमको सहभागिता रहेको प्रतियोगितामा प्रथम हुने टिमले नगद २५ हजार रुपैयाँ सहित ट्रफी, मेडल र प्रमाणपत्र प्राप्त गर्नेछ भने उप बिजेता हुने टिमले नगद १५ हजार रुपैयाँ सहित ट्रफी, मेडल र प्रमाणपत्र प्राप्त गर्नेछ । त्यसै गरि तृतीय र चौथो हुने टिमले ५/५ हजार रुपैयाँ प्राप्त गर्ने आयोजकले जनाएको छ । प्रतियोगिता अन्तरगत मंगलबार दोस्रो चरणका बाँकी खेलहरु संचालन हुने खेल तालिका रहेको छ ।