प्रथम देवचुली गोल्ड कप फुटबल प्रतियोगिता : आइतबार योङ ब्वाइज चितवन विजयी

देवचुली । देवचुली १० मा संचालित प्रथम देवचुली गोल्ड कप फुटबल प्रतियोगितामा आइतबार योङ ब्वाइज चितवन विजयी भएको छ । शान्तिदिप युवा क्लबको आयोजनामा संचालित प्रतियोगितामा योङ ब्वाइज चितवन विजयीका विरुद्ध देवचुली नगरपालिका बिच आइतबार भएको खेलमा योङ ब्वाइज चितवन विजयी भएको हो ।

योङ ब्वाइजले देवचुली नगरपालिकालाई २-१ गोल अन्तरले हराउँदै दोस्रो चरणमा प्रवेश गरेको हो । प्रतियोगितामा योङ ब्वाइज चितवनका विवेक बिक र सन्जित सुनारले १/१ गोल गरेका थिए भने देवचुली नगरपालिकाका सनसाईन मल्लले गोल गरेका थिए । आइतबारको खेलमा योङ ब्वाइज चितवनका सिमान्सु थापा म्यान अफ दि म्याच भएका थिए ।

नवलपुर , चितवन र नवलपरासी पश्चिमका १४ टिमको सहभागिता संचालन हुन लागेको प्रतियोगितामा प्रथम हुने टिमले २ लाख ७५ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने उपबिजेता हुने टिमले १ लाख ५० हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ। प्रतियोगिताको सेमिफाइनल पुग्ने २ टिमले २५ हजार रुपैयाँँ नगद समेत प्राप्त गर्नेछन् । त्यसै गरि उत्कृष्ट खेलाडी, सर्वोकृष्ट गोलरक्षक, सर्वाधिक गोलकर्ता तथा अनुशासित टिमलाई नगद ५ हजार रुपैयाँँ पुरस्कारको व्यवस्था रहेको शान्तिदिप युवा क्लबका अध्यक्ष अमरबहादुर घर्ती मगरले बताउनुभयो । प्रतियोगितामा सोमबार अभिषेक चर्च रजहरका विरुद्ध नवलपुर ११ बिच खेल हुने आयोजकले जनाएको छ ।

देवचुली नगरपालिका संरक्षक रहेको प्रतियोगितामा देवचुली १० वडा कार्यालय, वडा युवा तथा खेलकुद विकास समिति देवचुली १०, देवचुली नगर युवा तथा खेलकुद विकास समिति, जिल्ला खेलकुद विकास समिति नवलपुर, जिल्ला फुटबल संघ नवलपुरको सहकार्य र समन्वय रहेको छ । प्रतियोगिताको प्रायोजक सदभाव इन्टरनेशनल एजुकेसन रहेको छ ।