सेन्ट्रल कलेज प्रथम देवप्रगति सेभेन ए साइड फुटबल प्रतियोगिता : बाल स्टार हसौराको विजयी सुरुवात

देवचुली । देवचुलीमा सेन्ट्रल कलेज प्रथम देवप्रगति सेभेन ए साइड फुटबल प्रतियोगिता सुरु भएको छ । विजयादशमीको अवसरमा देवप्रगति युवा समाजले भीमसेन आदर्श माविको खेलमैदानमा प्रतियोगिता सुरु भएको हो ।

प्रतियोगिताको उद्घाटन खेलमा बाल स्टार हसौराको विजयी भएको छ । बुधबार देवचुली मिनि क्लब देवचुली ९ का विरुद्ध बाल स्टार हसौरा बिच भएको खेलमा बाल स्टार हसौरा विजयी भएको हो । हसौराले देवचुली मिनी क्लबलाई ५-० गोल अन्तरले हराउँदै दोस्रो चरणमा प्रवेश गरेको हो । बुधबारको खेलका टेन स्टार हसौराका युवराज महतो म्यान अफ दि म्याच भएका थिए ।

प्रतियोगितामा प्रथम हुने टिमले ५५ हजार ५ सय ५५ रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने उपबिजेता हुने टिमले ३३ हजार ३ सय ३३ रुपैयाँ नगदसहित मेडल, ट्रफी र प्रमाणपत्र प्राप्त गर्नेछ। त्यसै गरि उत्कृष्ट खेलाडी, सर्वोकृष्ट गोलरक्षक, सर्वाधिक गोलकर्ता तथा उत्कृष्ट डिफेन्डरलाई पुरस्कारको व्यवस्था रहेको खेल संयोजक अर्पण सुबेदीले जानकारी दिए । प्रतियोगितामा बिहीबार योङ्ग ब्वाइज चितवनका विरुद्ध कदमपुर र कुजौलीका विरुद्ध देवचुली ७ बिच खेल हुने आयोजकले जनाएको छ । प्रतियोगिताको मुख्य प्रायोजक सेन्ट्रल कलेज भरतपुर रहेको छ भने सह प्रायोजकमा इस्कान कोरियन भाषा इन्टिच्युट र स्मार्ट लिंक नेटवर्क रहेका छन् ।

यसै बिच देवप्रगति युवा समाजका अध्यक्ष त्रिलोचन पराजुलीको अध्यक्षतामा भएको प्रतियोगिता उदघाटन समारोहमा सेन्ट्रल कलेज भरतपुरका प्रिन्सिपल यज्ञ विलास पौडेलको प्रमुख आतिथ्यता रहेको थियो । त्यसै गरि जिल्ला खेलकुद विकास समितिका अध्यक्ष सेतमान पुन, देवचुली ७,९ र ११ का वडा सदस्यहरु, सहयोगी संघसंस्थाका प्रतिनिधि, समाजसेवी लगायत खेलप्रेमीहरुको उपस्थिति रहेको थियो ।