मध्यबिन्दु नगरपालिकामा किशोरी सशक्तिकरण कार्यक्रमको जानकारी सहित सल्लाहकार समिति गठन

नवलपुर । नवलपुरको मध्यबिन्दु नगरपालिकामा किशोरी सशक्तिकरण कार्यक्रमको जानकारी सहित सल्लाहकार समिति गठन गरिएको छ । जागृति बाल तथा युवा सरोकार नेपालले क्यान्नलानको सहयोगमा संचालन गर्न लागेको किशोरी सशक्तिकरण कार्यक्रमको बारेमा जानकारी सहित सल्लाहकार समिति गठन गरिएको हो ।

जागृति बाल तथा युवा सरोकार नेपालका अध्यक्ष तिलोतम पौडेल लैंगिक समानता र किशोरीहरुलाई सशक्त गराउनका लागि संस्थाले ३ वर्षसम्म नगरपालिकासँग समन्वय गर्दै कार्यक्रम गर्ने बताउनुभयो । नवलपुरका देवचुली र कावासोती नगरपालिकामा ३/३ वर्षसम्म संचालन भएको कार्यक्रमले किशोरीहरुलाई सशक्तिकरण बनाउन महत्त्वपूर्ण भुमिका खेलेको बताउँदै मध्यबिन्दु नगरपालिकामा सरोकारवालाको समन्वयमा कार्यक्रम गर्न लागिएको उहाँले बताउनुभयो । पालिकाका १५ वडाबाट छनोट भएका ३० जना किशोरीहरुलाई विभिन्न चरणमा विविध विषयमा तालिम प्रदान गर्दै समुदायमा रहेका किशोरीहरुलाई सचेतना प्रवाह गर्ने गरि कार्यक्रम तय गरिएको उहाँले जानकारी गराउनुभएको थियो ।

संस्थाका अध्यक्ष तिलोतम पौडेलको अध्यक्षतामा भएको कार्यक्रममा मध्यबिन्दु नगरपालिकाका नगर प्रमुख भिमलाल अधिकारीको प्रमुख आतिथ्यता रहेको थियो ।

त्यसै गरि नगर उप प्रमुख पुर्णकला चौधरी, नगर प्रवक्ता, वडा अध्यक्षहरु, कार्यपालिका सदस्य, विद्यालयका व्यवस्थापन समितिका अध्यक्ष, प्रधानाध्यापक, संचारकर्मी लगायतको उपस्थितिमा कार्यक्रमको बारेमा जानकारी गराइएको हो ।

तीन वर्षसम्म संचालन हुने कार्यक्रमका लागि नगर उप पुर्णकला चौधरीको संयोजकत्वमा सल्लाहकार समिति गठन गरिएको छ । जसको सदस्यमा वडा अध्यक्षबाट मानबहादुर चौधरी, कार्यपालिका सदस्यबाट प्रकाश परियार, शिक्षा शाखाबाट गिता चापागाई, स्वास्थ्य शाखाबाट जायश्वर भुसाल, महिला बालबालिका तथा ज्येष्ठ नागरिक शाखाबाट पुष्पा रिजाल, युवा संजालबाट प्रकाश रेग्मी, संचारकर्मीबाट निशा भण्डारी, खेलकुद विकास समितिबाट हिमाल सिं ठकुरी, मध्यबिन्दु उद्योग वाणिज्य संघबाट किरणकुमार श्रेष्ठ, प्रधानाध्यापकहरुबाट हरि देवकोटा, व्यवस्थापन समितिका अध्यक्षबाट बाबुराम पाण्डे, शिक्षक अभिभावक संघका तर्फबाट पदमबहादुर थापालाई चयन गरिएको संस्थाका महासचिव दिपक शर्माले जानकारी गराउनुभयो । त्यसै गरि १/१ जना बाल क्लबको प्रतिनिधि र बालिकाको प्रतिनिधि चयन गरिने उहाँले बताउनुभयो ।

मध्यबिन्दु नगरपालिकाले बालबालिकाका विभिन्न कार्यक्रम संचालन गर्न लागिरहेको र संस्थालाई पालिकामा कार्यक्रम संचालन गर्न अनुरोध गरेकोमा आगामी तीन वर्ष संस्थासँग समन्वय गर्दै कार्यक्रमलाई सफल बनाउन नगरपालिकाले आवश्यक सहयोग गर्ने नगर प्रमुख भिमलाल अधिकारीले बताउनुभयो । कार्यक्रममा सहभागी भएका ३० जना किशोरीहरुसँग विभिन्न वडामा संचालन हुने सचेतनाबाट बालबालिकालाई फाइदा पुग्ने उहाँले बताउनुभयो । कार्यक्रममा नगर उप प्रमुख पुर्णकला चौधरी, नगर प्रवक्ता रणबहादुर थापा, विद्यालय व्यवस्थापन समितिबाट दानबहादुर रायमाझी, प्रधानाध्यापकबाट हरि देवकोटा, स्वास्थ्य शाखा प्रमुख जायश्वर भुसाललगायतले कार्यक्रम सफलताको शुभकामना व्यक्त गर्नुभएको थियो । सो कार्यक्रमको संचालन संस्थाका सदस्य दिपक न्यौपानेले गर्नुभएको थियो ।