जिल्ला खेलकुद विकास समिति नवलपुरको कार्यालय भवन बन्दै

नवलपुर । जिल्ला खेलकुद विकास समिति नवलपुरको आफ्नै कार्यालय भवन बन्ने भएको छ । प्रदेश खेलकुद परिषद गण्डकीद्वारा निर्माण गर्न लागिएको भवन निर्माणका लागि टेण्डर प्रक्रियामा अगाडि बढेको हो ।

कावासोती ३ अठाईस बिगाहामा रहेको १ बिघा ३ कठ्ठा क्षेत्रफलमा रहेको खेलमैदानमा भवन निर्माण गर्न लागिएको प्रदेश खेलकुद परिषद गण्डकीका सदस्य सचिव श्रीधर शर्माले जानकारी दिनुभयो । उहाँका अनुसार यस वर्ष भवन निर्माणका लागि ५३ लाख ६१ हजार ९ सय रुपैयाँँको टेण्डर आव्हान गरिएको र तत्काल नै निर्माण कार्य अगाडि बढ्ने साथै अर्को वर्ष थप बजेट विनियोजन गरि निर्माण कार्य सम्पन्न गर्ने योजना रहेको बताउनुभयो । नवलपुरमा सेमिनार हल सहित कार्यालय निर्माण गर्न थालिएको उहाँले बताउनुभयो ।

कावासोती ३ मा राष्ट्रिय आवास कम्पनीले नापी गर्दा खेल मैदान भनेर छुट्याइएको १ बिघा ३ कठ्ठा जग्गा तत्कालीन जिल्ला खेलकुद विकास समितिका अध्यक्ष सेतबहादुर पुन र कोषाध्यक्ष कोषराज कार्कीको सक्रियतामा वडा भेला, वडा कार्यालयको सिफारिस र नगर कार्यपालिकाको सिफारिस, राष्ट्रिय आवास कम्पनी धनेवाको सिफारिस, प्रदेश खेलकुद परिषदको सरकारी कार्यालय हो भन्ने पत्र लगायत सम्पुर्ण कागजातहरु राष्ट्रिय आवास कम्पनी पेश गरि जिल्ला खेलकुद विकास समिति नवलपुरको स्वामित्वका लागि प्रक्रिया अगाडि समेत बढेको र उक्त जग्गामा नै भवन निर्माण गर्न लागिएको हो ।

जिल्ला खेलकुद विकास समितिको कार्यालय भवन निर्माण प्रक्रिया अगाडि बढेको र अर्को वर्षसम्म आफ्नै भवनबाट कार्यालय संचालन हुने जिल्ला खेलकुद विकास समितिका अध्यक्ष सेतबहादुर पुनले बताउनुभयो ।