दोस्रो देवचुली उपमेयर कप भलिबल प्रतियोगिताको उपाधि देवचुली ९ लाई

देवचुली । देवचुली नगरपालिका वडा नम्बर ८ मा संचालन भएको दोस्रो उपमेयर कप भलिबल प्रतियोगिताको उपाधि देवचुली ९ ले जितेको छ। देवचुली नगरपालिका युवा तथा खेलकुद विकास समितिको आयोजना तथा युवा तथा खेलकुद विकास समिति देवचुली ८ को सह-आयोजनामा देवचुली-८ वडा कार्यालय भवन नजिकैको मैदानमा चैत्र १८ गतेदेखि सुरु भएको प्रतियोगिता बुधबार सम्पन्न भएको हो । प्रतियोगिताको पुरुष तर्फ भएको फाइनल खेलमा देवचुली ८ लाई हराउँदै देवचुली ९ ले उपाधी जितेको हो भने महिलातर्फ देवचुली ८ लाई नै हराउँदै देवचुली ९ ले उपाधी जितेको हो ।

प्रतियोगितामा पुरुषतर्फ बिजेता भएको देवचुली ९ ले नगद ३५ हजार रुपैयाँसहित मेडल, प्रमाणपत्र र ट्रफी प्राप्त गरेको छ भने उपबिजेता भएको देवचुली ८ ले नगद २० हजार रुपैयाँसहित मेडल, प्रमाणपत्र र ट्रफी प्राप्त गरेको छ । त्यसै गरि महिलातर्फ प्रथम भएको देवचुली ९ ले नगद ११ हजार रुपैयाँसहित मेडल, प्रमाणपत्र र ट्रफी प्राप्त गरेको छ भने उपबिजेता देवचुली ८ ले नगद ७ हजार रुपैयाँसहित मेडल, प्रमाणपत्र र ट्रफी प्राप्त गरेको हो । प्रतियोगितामा पुरुष तर्फ ९ टिम र महिला तर्फ ५ टिमको सहभागिता रहेको देवचुली नगरपालिका युवा तथा खेलकुद विकास समितिका उपाध्यक्ष अमरबहादुर घर्ती मगरले जानकारी दिनुभयो ।

देवचुली नगरपालिका युवा तथा खेलकुद विकास समितिका अध्यक्ष दिपकचन्द्र भट्टराईको अध्यक्षता भएको प्रतियोगिता समापन समारोहमा देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि उप प्रमुख पार्वता तिवारी, विभिन्न संघसंस्थाका प्रतिनिधि, देवचुली नगरपालिका युवा तथा खेलकुद विकास समितिका पदाधिकारी तथा सदस्यहरु, वडा युवा तथा खेलकुद विकास समितिका पदाधिकारीहरु लगायत खेलप्रेमीहरुको उपस्थिति रहेको थियो ।