आज: २०८१ चैत्र २१, बिहिबार | Thu, 03, Apr, 2025 Search
देवचुली । नेपाल इन्भेस्टमेन्ट मेगा बैंक रजहरद्वारा विद्यार्थीहरुलाई वित्तिय साक्षरता प्रदान गरिएको छ । `थिंक बिफोर यु फलो, वाइज मनी टुमारो´ भन्ने नारासहित विश्वभर मनाइँदै आएको ग्लोबल मनी वीक-२०२५ को अवसरमा शुक्रबार नेपाल इन्भेस्टमेन्ट मेगा बैंक रजहरद्वारा देवचुली १६ मा रहेको देवचुली कलेजका विद्यार्थीलाई वित्तिय साक्षरता कार्यक्रम गरिएको हो ।
कार्यक्रममा बैंकिङ प्रणाली, बचतको आवश्यकता, खाताका प्रकार, लगानीको प्रारम्भिक ज्ञान, मोबाइल बैंकिङ, साइबर सुरक्षा र डिजिटल ठगीबाट कसरी जोगिने भन्ने विषयमा जानकारी दिइएको बैंकका शाखा प्रबन्धक मुकेश अधिकारीले बताउनुभयो । उहाँका अनुसार वर्तमान युवापुस्तालाई डिजिटल वित्तीय प्रणालीसँग परिचित गराई सुरक्षात्मक उपायहरू अवलम्बन गर्न आवश्यक भएकोमा सो विषयमा जोड दिइएको हो ।
विद्यार्थीहरुलाई बचतको महत्व सहित डिजिटल वित्तिय सचेतना गराउनका लागि कार्यक्रम फलदायी भएको देवचुली क्याम्पसका प्रमुख शिवहरी अधिकारीले बताउनुभयो । विद्यार्थी जीवनबाट नै विद्यार्थीहरुलाई वित्तिय ज्ञान दिन सकिए भविष्यमा उनीहरुले यसलाई पालना गर्न सहज हुने भएकाले पनि कार्यक्रम विद्यार्थी जीवनमा महत्वपूर्ण रहेको उहाँको भनाई रहेको थियो ।
३० जना विद्यार्थी सहभागी कार्यक्रममा बैंकका शाखा प्रबन्धक मुकेश अधिकारी, शाखाका कर्मचारीहरु विष्णु भण्डारी र श्याम प्रसाद सापकोटाले विद्यार्थीहरुलाई साक्षरता प्रदान गर्नुभएको थियो । बैंकका अनुसार ग्लोबल मनी वीक-२०२५ को अवसरमा देशभरका शाखाबाट वित्तिय साक्षरता कार्यक्रम संचालन गरिएको छ ।
