देवचुलीमा भूमी समस्या समाधान सम्बन्धि अभिमुखीकरण

देवचुली । देवचुली नगरपालिकामा भूमिहीन दलित, भूमिहीन सुकुम्बासी तथा अव्यवस्थित बसोबासी सम्बन्धि समस्या समाधानका लागि स्थानीय तहका पदाधिकारी,कर्मचारी तथा सरोकारवालालाई अभिमुखीकरण गरिएको छ । देवचुली नगरपालिकाकाको आयोजना तथा भूमी समस्या समाधान आयोग जिल्ला समितिको सहजीकरणमा बिहीबार देवचुली नगरपालिकाको सभाहलमा कार्यक्रम गरिएको हो ।

देवचुली नगरपालिकाका नगर प्रमुख हरिप्रसाद न्यौपानेको अध्यक्षतामा भएको अभिमुखीकरण कार्यक्रममा भूमी समस्या समाधान आयोग नवलपुरका पदाधिकारीहरुलाई स्वागत तथा बधाई ज्ञापन गर्दै अन्तरक्रिया गरिएको हो । कार्यक्रममा बोल्दै नगरप्रमुख न्यौपानेले सुकुम्बासीहरुको आन्दोलन भएको नगरपालिका साथै नगर कार्यपालिकाको सुकुम्बासी समस्या समाधानको लागि पहिलो प्राथमिकता भएकाले यहाँको समस्या समाधानका लागि भूमी समस्या समाधान आयोग नवलपुरसँग सहकार्य गर्न नगरपालिका तयार रहेको बताउनुभयो । सुकुम्बासी तथा अव्यवस्थित बसाईको समस्यालाई चाँडै नै आवश्यक प्रकृया पुर्‍याई लालपुर्जा दिनका लागि सहजीकरण गर्न समेत उहाँले आग्रह गर्नुभएको थियो । नगरले भूमि सम्बन्धि काम गर्नका लागि कर्मचारीहरुको व्यवस्थापन गरि काम गरिरहेको र आवश्यक पर्ने सबै काममा नगरपालिका सदैव तयार रहेको न्यौपानेले बताउनुभयो ।

अन्तरक्रियामा वडा अध्यक्ष तथा सरोकारवालाहरुले छ्लफल भन्दा पनि लालपुर्जा आवश्यक भएको बताउँदै सबै प्रक्रिया पूरा गरेर लालपुर्जा बाढ्ने काम अगाडी बढाउन आग्रह गर्नुभएको थियो । उहाँहरुले सरकार फेरिएसँगै नयाँ आयोग गठन हुँदा समस्या भईरहेको बताउँदै आयोगलाई रोकिएको कामलाई तिव्र गतिमा अगाडि बढाउनुपर्ने भनाई राख्नुभएको थियो । सरोकारवालाहरुले भूमी समस्या सम्बन्धि जिज्ञासा समेत राख्नुभएको थियो ।

सरोकारवालाहरुले राखेको जिज्ञासाहरुलाई जिल्ला नापी कार्यालयका प्रमुख तथा भूमी समस्या समाधान आयोगका सदस्य सचिव पुर्णहरी सुबेदीले सम्बोधन गर्दै अबका दिनमा गरिने कार्यहरुको जानकारी गराउनुभएको थियो । नवगठित आयोगका अध्यक्ष तारापति खरेलले सरकारले आयोगलाई भूमिहीन दलित, सुकुम्बासी र अव्यवस्थित बसोबासीको पहिचान र प्रमाणीकरणको आधार र मापदण्ड तोक्ने, स्थानीय तहबाट लगत संकलनको लागि आवश्यक कार्यविधि र ढाँचा तयार गरी स्वीकृत गर्ने, तिनको पहिचान, लगत संकलन र प्रमाणीकरणको काम स्थानीयतमार्फत गर्ने, सम्बन्धित मालपोत कार्यालयसँग समन्वय गरी सम्बन्धित नापी कार्यालयबाट जग्गा नापजाँच गरी नक्सा श्रेस्ता तयार गर्ने गराउने अधिकार दिएको बताउनुभयो । स्थानीय तहसँग समन्वय गरेर काम गर्ने साथै चाँडै नै सुकुम्बासीहरुको समस्या समाधान गर्न आफुहरु लागि पर्ने समेत उहाँले बताउनुभयो ।

आयोगका विज्ञ सदस्य होमनाथ पौडेलले स्थानीय तहबाट प्राप्त तथ्यांकको विश्लेषण गर्न आवश्यक प्रणालीको विकास गरी सोही प्रणालीको आधारमा अव्यवस्थित बसोबासीको जग्गाको वर्गाीकरण गर्ने, अव्यवस्थित बसोबासीलाई जग्गा उपलब्ध गराए बापत ऐन बमाजिमको दस्तुर लिने, हदबन्दीभन्दा बढी भई रोक्का रहेका जग्गा भूमिहीन दलित, भूमिहीन सुकुम्बासीलाई उपलब्ध गराउने लगायतको विषयमा जानकारी सहित सहजीकरण गर्नुभएको थियो।

कार्यक्रममा देवचुली नगरपालिकाका प्रमुख प्रशासकीय अधिकृत दिवाकर पौडेल, आयोगका सदस्य पुर्ण प्रकाश सुनार, नगर प्रवक्ता तिलप्रसाद काफ्ले, वडा अध्यक्ष, कार्यपालिका सदस्य, भूमी समस्या समाधानका लागि पालिकामा गठित सहजीकरण समितिका पदाधिकारी, कर्मचारी लगायतको उपस्थिति रहेको थियो । सो कार्यक्रमको सहजीकरण देवचुली नगरपालिकाका प्रमुख प्रशासकीय अधिकृत दिवाकर पौडेलले गर्नुभएको थियो ।