आज: २०८१ चैत्र २२, शुक्रबार | Fri, 04, Apr, 2025 Search
राजु चापागाईं, नवलपुर । नवलपरासी (बर्दघाट सुस्तापूर्व)नवलपुरको देवचुली नगरपालिकाले एसइईमा सहभागि परीक्षार्थीलाई लक्षित गरी हेल्थ डेस्क सञ्चालन गरेको छ । देवचुली नगरपालिका भित्र रहेका सबै परीक्षाकेन्द्रमा हेल्थ डेस्क सञ्चालन गरिएको हो ।
पालिका भित्रका वरचुली मावि, देवचुली मावि, नेपाल मावि, जनज्योति नमुना मावि र जनज्योति माविमा रहेका एसइई परीक्षा केन्द्रमा स्वास्थ्यकर्मी सहित हेल्थ डेस्क सञ्चालन गरिएको देवचुली नगरपालिका नगर प्रमुख हरिप्रसाद न्यौपानेले बताउनुभयो ।
देवचुली नगरपालिकाबाट १ हजार ६९ जना परीक्षार्थी एसइई परीक्षामा सहभागी छन् । साधारण धारतर्फ ९९७ जना तथा प्राविधिक तर्फ ७२ जना परीक्षार्थी रहेको देवचुली नगरपालिकाका शिक्षा प्रमुख रामप्रसाद शर्माले जानकारी दिनुभयो । उहाँका अनुसार नगरपालिकाका ५ परीक्षा केन्द्रबाट देवचुली नगरपालिकाका १७ विद्यालयका विद्यार्थीले परीक्षा दिइरहेका छन् । जसमा ९ सामुदायिक विद्यालय, ७ वटा संस्थागत विद्यालय र १ वटा गुरुकुल रहेको छन् । एसइईका विद्यार्थीलाई मध्यनजर गर्दै देवचुली नगरपालिकाद्वारा प्राथमिक उपचारका सामाग्री सहित सेनेटरी प्याड, मास्क, औषधीहरू सहित स्वास्थ्यकर्मी हेल्थ डेस्क राखिएको उहाँले बताउनुभयो ।
देवचुली नगरपालिकाले स्वास्थ्यकर्मी र औषधि सहित हेल्थ डेस्क स्थापना गरी परीक्षाको समयमा स्वास्थ्य समस्या भएका परीक्षार्थीहरूको स्वास्थ्य परीक्षण सहित उपचार गर्ने गरी केन्द्रहरूमा एसइई परीक्षा अवधिभर डेस्क राखिने देवचुली नगरपालिकाका नगर प्रमुख न्यौपानेले बताउनुभयो । ‘परीक्षार्थीलाई सहज वातावरणमा परीक्षा दिन र स्वास्थ्य समस्या भएमा तत्काल नै उपचार गर्न सकिने व्यवस्था मिलाएका छौँ, यसले कुनै विद्यार्थीमा अचानक केही स्वास्थ्य समस्या देखिए तत्काल उपचार गरि परीक्षा दिन सक्नेछन् , नगर प्रमुख न्यौपानेले भन्नुभयो । स्वास्थ्य शाखाबाट निरन्तर स्वास्थ्यकर्मीहरू परिचालन गर्ने गरी हेल्थ डेस्क राखिएको उहाँको भनाई छ । समयमै प्राथमिक उपचार भएमा परीक्षार्थीहरूलाई सहज हुने भएकाले पालिकाले प्राथमिकता दिएर डेस्क राखिएको समेत उहाँले बताउनुभयो ।
परीक्षा केन्द्रमा हेल्थ डेस्क सञ्चालनबाट परीक्षार्थीको स्वास्थ्य समस्या भएमा तत्काल उपचार पाउन सहज हुने नेपाल माविका प्रधानाध्यापक शिवप्रसाद देवकोटाले बताउनुभयो । हेल्थ डेस्क उपयोगी रहेको र परीक्षाको अवधिमै तत्काल उपचार गरेर परीक्षा दिने विद्यार्थीहरूको समयको समेत बचत हुने उहाँले बताउनुभयो । केन्द्राध्यक्ष समेत रहनुभएका देवकोटाले हेल्थ डेस्कबाट बिहीबार पहिलो दिन नै केही परीक्षार्थीहरूले उपचार पाएको जानकारी दिनुभयो । ‘ हातमा चोट भएकी एक परीक्षार्थीलाई प्राथमिक उपचार गरी पुन परीक्षामा सहभागी गराइयो’ उहाँले भन्नुभयो, तत्काल उपचार हुने गरी राखिएको डेस्कबाट परीक्षार्थीलाई फाइदा पुग्नेछ ’ देवकोटाले भन्नुभयो ।
