आज: २०८१ चैत्र २१, बिहिबार | Thu, 03, Apr, 2025 Search
देवचुली । देवचुली नगरपालिकामा मेलमिलाप सम्बन्धि पुनर्ताजगी तालिम सुरु भएको छ । देवचुली नगरपालिकाको आयोजना तथा कारितास नेपालको सहकार्यमा देवचुली नगरपालिका न्यायिक समिति अन्तर्गत रहेका मेलमिलापकर्ताहरुलाई तिन दिनको पुनर्ताजगी तालिम बुधबारबाट सुरु गरिएको हो ।
देवचुली नगरपालिकाका १७ वडामा ५१ जना मेलमिलापकर्ताहरु रहेका छन् । मेलमिलापकर्ताहरुलाई वडामा आएका विवादका उजुरीहरु,विवाद समाधान गर्न खोज्दा भएका समस्याहरु, कानुनी उपचारका लागि मेलमिलापकर्ताको भुमिका,विवाद समाधान कसरी गर्ने लगायतका विषयमा तालिममा सहजीकरण गरिने नगर उपप्रमुख तथा न्यायिक समिति संयोजक पार्वता तिवारीले बताउनुभयो । नगरका सम्पूर्ण विकास निर्माणका काम तथा गतिविधिहरु र त्यसमा आएका विवादहरुमा सहजिकरण गरि विवाद समाधानमा सहयोग गर्न नगर उप प्रमुख पार्वता तिवारीले मेलमिलापकर्तालाई आग्रह गर्नुभएको थियो ।
देवचुली नगरपालिकाका नगर उप प्रमुख पार्वता तिवारीको अध्यक्षतामा भएको तालिमको उदघाटन सत्रमा देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि प्रमुख प्रशासकीय अधिकृत दिवाकर पौडेल, नगर प्रवक्ता तिलप्रसाद काफ्ले, वडा अध्यक्षहरु, कार्यपालिका सदस्यहरु, मेलमिलापकर्ताहरु, कारितास नेपालका प्रतिनिधि लगायतको उपस्थिति रहेको थियो । तिन दिनसम्म संचालन हुने तालिमको अधिवक्ता इन्दु तुलाधर र देवचुली नगरपालिकाका कानुनी सल्लाहकार गणेश सापकोटाले सहजीकरण गर्ने जनाइएको छ।
तालिमको उदघाटनमा देवचुली ९ का वडा अध्यक्ष तथा न्यायिक समिति सदस्य बलिराम सापकोटाको स्वागत मन्तव्य राख्नुभएको थियो भने न्यायिक समिति सचिवालय सदस्य सचिव निर्मला कंडेलले कार्यक्रमको सहजीकरण गर्नुभएको थियो।
स्थानीय तहमा देखिएका विवादलाई स्थानीय स्तरबाटै समाधानका लागि संविधान तथा स्थानीय सरकार संचालन ऐन २०७४ ले गरेको व्यवस्थालाइ कार्यान्वयन गर्न , समाजमा शान्ति स्थापनार्थ महत्वपूर्ण भूमिका निर्वाह गर्नको लागि मेलमिलापकर्ताको व्यवस्था गरिएको छ ।
