आज: २०८१ चैत्र २१, बिहिबार | Thu, 03, Apr, 2025 Search
देवचुली । देवचुली नगरपालिकामा संचालित चौथो देवचुली मेयर कप फुटबल प्रतियोगितामा शुक्रबार गैंडाकोट फुटबल क्लब विजयी भएको छ । देवचुली नगरपालिका युवा तथा खेलकुद विकास समितिको आयोजना तथा फारम खेलकुद विकास समितिको सह आयोजनामा वरचुली माविको खेलमैदान देवचुली १७ मा शुक्रबार गैंडाकोट फुटबल क्लबका विरुद्ध ठकुरी ब्वाइजबीच भएको खेलमा गैंडाकोट फुटबल क्लब विजयी हुँदै दोस्रो चरणमा प्रवेश गरेको हो ।
गैंडाकोट फुटबल क्लबले ठकुरी ब्वाइजलाई २-१ गोल अन्तरले हराएको हो । शुक्रबार भएको खेलमा गैंडाकोट फुटबल क्लबका विवश नेपाली म्यान अफ दि म्याच भएका थिए ।
नवलपुर, चितवन र पश्चिम नवलपरासीका १५ टिमको सहभागिता रहेको प्रतियोगितामा प्रथम हुने टिमले १ लाख ५५ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने उपबिजेता हुने टिमले ८१ हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ। त्यसै गरि सेमिफाइनल पुग्ने दुई टिमले २०/२० हजार रुपैयाँ प्राप्त गर्नेछन् । प्रतियोगिताको उत्कृष्ट खेलाडी, सर्वोकृष्ट गोलरक्षक, सर्वाधिक गोलकर्तालाई पुरस्कारको व्यवस्था रहेको फारम खेलकुद विकास समितिका अध्यक्ष प्रकाश हमालले जानकारी दिए ।
प्रतियोगिता अन्तरगत शनिबार कावासोतीका विरुद्ध पटिहानी फुटबल क्लबबीच क्वाटर फाइनल खेल हुने आयोजकले जनाएको छ ।
