देवचुली नगरपालिकाले उचाल्यो वीपी स्मृति कप रनिङ शिल्डको उपाधि

देवचुली । गैंडाकोट नगरपालिकामा संचालन भएको वीपी स्मृति कप अन्तरपालिका रनिङ शिल्ड फुटबलको उपाधि देवचुली नगरपालिकाले उचालेको छ । नेपाली काँग्रेस गैंडाकोटको आयोजनामा क्षेत्रीय रंगशाला गैँडाकोटमा संचालित प्रतियोगिताको फाइनल खेलमा हुप्सेकोट गाउँपालिकालाई हराउँदै देवचुलीले उपाधि जितेको हो ।

देवचुलीले हुप्सेकोटलाई २-० गोल अन्तरले हराउँदै उपाधि कब्जा गरेको हो । आज भएको फाइनल खेलमा देवचुलीका समीर श्रेष्ठ म्यान अफ दि म्याच भएका थिए । प्रतियोगिताको बिजेता देवचुली नगरपालिकाले एकलाख रुपैँया सहित मेडल, ट्रफी र प्रमाणपत्र प्राप्त गरेको छ भने उप बिजेता हुप्सेकोट गाउँपालिकाले ५० हजार रुपैँया सहित मेडल, ट्रफी र प्रमाणपत्र प्राप्त गरेको छ ।