चौथो देवचुली मेयर कप फुटबल प्रतियोगिता : सोमबार प्रगतिकला मन्दिर युवा क्लब विजयी

देवचुली । देवचुली नगरपालिकामा संचालित चौथो देवचुली मेयर कप फुटबल प्रतियोगितामा सोमबार प्रगतिकला मन्दिर युवा क्लब विजयी भएको छ । देवचुली नगरपालिका युवा तथा खेलकुद विकास समितिको आयोजना तथा फारम खेलकुद विकास समितिको सह आयोजनामा वरचुली माविको खेलमैदान देवचुली १७ मा सोमबार प्रगतिकला मन्दिर युवा क्लबका विरुद्ध रजहर फुटबल क्लबबीच भएको खेलमा प्रगतिकला मन्दिर युवा क्लब विजयी हुँदै दोस्रो चरणमा प्रवेश गरेको हो ।

प्रगतिकला मन्दिर युवा क्लबले रजहर फुटबल क्लबलाई ट्राइबेकरमा ५-३ गोल अन्तरले हराएको हो । निर्धारित समयको खेलमा दुवै टिमबाट गोलरहित बराबरी भएपछी खेल ट्राइबेकरमा गएको हो । सोमबार भएको खेलमा प्रगतिकला मन्दिर युवा क्लबका विशाल सारु म्यान अफ दि म्याच भएका थिए ।

नवलपुर, चितवन र पश्चिम नवलपरासीका १५ टिमको सहभागिता रहेको प्रतियोगितामा प्रथम हुने टिमले १ लाख ५५ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने उपबिजेता हुने टिमले ८१ हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ। त्यसै गरि सेमिफाइनल पुग्ने दुई टिमले २०/२० हजार रुपैयाँ प्राप्त गर्नेछन् । प्रतियोगिताको उत्कृष्ट खेलाडी, सर्वोकृष्ट गोलरक्षक, सर्वाधिक गोलकर्तालाई पुरस्कारको व्यवस्था रहेको फारम खेलकुद विकास समितिका अध्यक्ष प्रकाश हमालले जानकारी दिए । प्रतियोगिता अन्तरगत मंगलबार पटिहानी युवा क्लबका विरुद्ध देवचुली नगरपालिकाबीच खेल हुने आयोजकले जनाएको छ ।