भीमसेन माविको ५५ औं वार्षिकोत्सव तथा अभिभावक दिवस सम्पन्न

देवचुली । देवचुली नगरपालिका वडा नम्बर ७ मा रहेको भीमसेन आदर्श नमुना माध्यमिक विद्यालयको ५५ औं वार्षिकोत्सव तथा अभिभावक दिवस सम्पन्न भएको छ । मंगलबार विद्यालय प्राङ्गणमा औपचारिक समारोहका बीच कार्यक्रम सम्पन्न गरिएको हो।

भीमसेन आदर्श नमुना माध्यमिक विद्यालयका व्यवस्थापन समितिका अध्यक्ष भुमिलाल लामिछानेको अध्यक्षतामा भएको कार्यक्रममा देवचुली नगरपालिकाकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो ।

कार्यक्रममा बोल्दै प्रमुख अतिथि न्यौपानेले भीमसेनले शैक्षिक क्षेत्रमा उदाहरणीय काम गरेको बताउँदै सदैव शैक्षिक प्रगतिको निरन्तरताको कामना गर्नुभएको थियो । भीमसेनले अन्य विद्यालयको अभिभावकको भुमिका खेल्नुपर्ने र शैक्षिक उपलब्धि हासिल गर्नका लागि आवश्यक सुझाव दिनुपर्ने बताउनुभयो । उहाँले पछिल्लो समय सामुदायिक विद्यालयहरुको शैक्षिक, भौतिक स्थितिमा निकै सुधार आएको भएता पनि वैदेशिक पढाईका लागि जाने विद्यार्थीलाई स्वदेशमै रोक्न सक्ने अवस्था भने नभएको बताउनुभयो । देवचुली नगरपालिकामा विद्यालय समायोजनको प्रक्रिया सुरु भएको र समायोजनबाट विद्यार्थीहरुको शैक्षिक गतिविधिमा असर नपर्ने उहाँले बताउनुभयो । देवचुली नगरपालिकाले भीमसेनले निर्माण गरिरहेको अधुरो भवनलाई आगामी नगरसभाबाट आवश्यक सहयोग गर्ने प्रतिबद्धता व्यक्त गर्नुभयो ।

कार्यक्रममा विद्यालयका प्रधानाध्यापक अग्निधर भुसालले विद्यालयको वार्षिक प्रगति प्रतिवेदन प्रस्तुत गर्नुभएको थियो । उहाँले विद्यालयको शैक्षिक स्तर वृद्धि गर्न आगामी कार्ययोजना तथा विद्यालयको आवश्यकताको बारेमा समेत जानकारी गराउनुभएको थियो । वार्षिकोत्सवकै अवसर पारी विद्यालयमा २०६५ सालमा गरिएको धनधान्यान्चल महायज्ञमा १० हजार रुपैयाँ भन्दा बढी सहयोग गर्ने सहयोगदाताहरुको नाम राखिएको शिलालेखको अनावरण गरिएको छ । नगर प्रमुख न्यौपानेले सो शिलालेखको अनामरण गर्नुभएको हो । त्यसै गरि वार्षिकोत्सवकै अवसरमा भीमसेन शैक्षिक दर्पणको विमोचन समेत गरिएको हो ।

कार्यक्रममा विद्यालयका पुर्व शिक्षक बिदाई, उत्कृष्ट शिक्षक, कर्मचारी तथा अभिभावकहरुलाई सम्मान गरिएको थियो । त्यसै गरि विद्यालयमा आयोजना गरिएको अतिरिक्त क्रियाकलाप, खेलकुद र उत्कृष्ट नतिजा ल्याउने विद्यार्थीहरुलाई पुरस्कृत समेत गरिएको थियो । वार्षिकोत्सवको कार्यक्रयमा विभिन्न कक्षाका विद्यार्थीहरुले सामुहिक नृत्य, सांस्कृतिक नृत्य तथा गायन पनि प्रस्तुत गरेका थिए ।

कार्यक्रममा बोल्ने वक्ताहरुले विद्यालयको शैक्षिक प्रगति राम्रो रहेको बताउँदै अझै नवीन कार्यको सुरुवात गर्न विद्यालयलाई शुभकामना समेत दिनुभएको थियो । कार्यक्रममा देवचुली नगरपालिकाका प्रमुख प्रशासकीय अधिकृत दिवाकर पौडेल, शिक्षा शाखा प्रमुख रामप्रसाद शर्मा, शिक्षा विकास तथा समन्वय इकाई नवलपुरका प्रमुख दिपेन्द्र राज श्रेष्ठ, विद्यालयका निवर्तमान प्रधानाध्यापक नरदेव न्यौपाने लगायतले शुभकामना मन्तव्य राख्नुभएको थियो।

वार्षिकोत्सव कार्यक्रममा देवचुली ७ का वडा अध्यक्ष भुमिसरा थापा, देवचुली ८ का वडा अध्यक्ष नुनप्रसाद बाचे, देवचुली ९ का वडा अध्यक्ष बलिराम सापकोटा, वडा सदस्यहरु, विद्यलयका पुर्व व्यवस्थापन समितिका अध्यक्षहरु, पुर्व प्रधानाध्यापकहरु, छिमेकी विद्यालयका प्रधानाध्यापकहरु, समाजसेवी व्यक्तित्वहरु, विभिन्न संघसंस्थाका प्रतिनिधिहरु लगायत शिक्षक, विद्यार्थी र अभिभावकहरुको उपस्थिति रहेको थियो । विद्यालयका सहायक प्रधानाध्यापक करनबहादुर खडकाले स्वागत गरेको कार्यक्रमको सहजीकरण शिक्षकहरु कृष्णप्रसाद काफ्ले, विष्णुप्रसाद न्यौपाने र कृष्णकला काफ्लेले गर्नुभएको थियो।