अन्तर विद्यालय फुटबल: छात्रतर्फ शान्ति निकुञ्ज र छात्रातर्फ सरस्वती मावि हसौरा फाइनल प्रवेश

देवचुली । कावासोती १२ मा संचालित कावासोती नगर स्तरीय अन्तर विद्यालय फुटबल प्रतियोगिता अन्तरगत शुक्रबार भएका खेलबाट छात्रतर्फ शान्ति निकुञ्ज मावि र छात्रातर्फ सरस्वती मावि हसौरा फाइनल प्रवेश गरेका छन् । कावासोती नगरपालिका खेलकुद विकास समितिको आयोजनामा कावासोती १२ को राजमन्दिर खेल मैदानमा संचालित प्रतियोगिता अन्तरगत शुक्रबार भएको सरस्वती नमुना मावि हसौराका विरुद्ध मध्यविन्दु स्काईलाइन कावासोतीबीच छात्रातर्फको दोस्रो सेमिफाइनल खेलमा सरस्वती नमुना मावि हसौरा विजयी भएको हो।

सरस्वती नमुना मावि हसौराले मध्यबिन्दु स्काईलाईनलाई २-० गोल अन्तरले हराउँदै फाइनल प्रवेश गरेको हो । खेलमा सरस्वती नमुना मावि हसौराका प्रतिमा मगर म्यान अफ दि म्याच भएकी थिइन् । त्यसै गरि जनता मावि शहिदनगरका विरुद्ध शान्ति निकुञ्ज माविबीच छात्रतर्फको दोस्रो सेमिफाइनल खेलमा शान्ति निकुञ्ज मावि विजयी हुँदै फाइनल प्रवेश गरेको छ । शान्ति निकुञ्ज माविले जनता माविलाई १-० गोल अन्तरले हराउँदै उपाधी नजिक पुगेको हो । खेलमा शान्ति निकुञ्ज माविका प्रशिश खनाल म्यान अफ दि म्याच भएका थिए ।

छात्र तर्फ १६ विद्यालय र छात्रा तर्फ ४ विद्यालयको सहभागिता रहेको प्रतियोगितामा छात्रतर्फ विजेता टिमले नगद ३० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ भने उप बिजेता हुने टिमले नगद २० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ । सेमिफाइनलबाट बाहिरिने टिमले नगद ५/५ रुपैयाँ प्राप्त गर्ने आयोजकले जनाएको छ । प्रतियोगिता अन्तरगत शनिबार सरस्वती नमुना मावि हसौराका विरुद्ध शान्ति निकुञ्ज माविबीच छात्रातर्फको फाइनल र सरस्वती नमुना मावि हसौराका विरुद्ध शान्ति निकुञ्ज माविबीच छात्रतर्फको फाइनल खेल हुने कावासोती नगरपालिका खेलकुद विकास समितिका अध्यक्ष ध्रुव खनालले जानकारी दिनुभयो ।