अन्तर विद्यालय फुटबल: सरस्वती मावि हसौरा, जनता मावि शहिदनगर र शान्ति निकुञ्ज सेमिफाइनल प्रवेश

देवचुली । कावासोती १२ मा संचालित कावासोती नगर स्तरीय अन्तर विद्यालय फुटबल प्रतियोगिता अन्तरगत बुधबार भएका खेलबाट सरस्वती मावि हसौरा, जनता मावि शहिदनगर र शान्ति निकुञ्ज मावि विजयी भएका छन् । कावासोती नगरपालिका खेलकुद विकास समितिको आयोजनामा कावासोती १२ को राजमन्दिर खेल मैदानमा संचालित प्रतियोगिता अन्तरगत बुधबार भएको समता शिक्षा निकेतनका विरुद्ध सरस्वती मावि हसौराबीच पहिलो खेलमा सरस्वती मावि हसौरा विजयी भएको हो।

सरस्वती माविले समता शिक्षालाई १-० गोल अन्तरले हराउँदै सेमि फाइनल प्रवेश गरेको हो । त्यसै गरि जनता मावि शहिदनगरका विरुद्ध ज्ञानोदय माविबीच भएको दोस्रो खेलमा जनता मावि विजयी हुँदै सेमिफाइनल प्रवेश गरेको छ । जनता माविले ज्ञानोदय माविलाई ३-१ गोल अन्तरले पराजित गर्दै जित निकालेको हो । बुधबार नै भएको शान्ति निकुञ्ज माविका विरुद्ध लर्ड बुद्ध एकेडेमी बीचको खेलमा शान्ति निकुञ्ज मावि विजयी हुँदै सेमिफाइनलमा प्रवेश गरेको हो । शान्ति निकुञ्ज माविले लर्ड बुद्धलाई ३-१ गोल अन्तरले हराएको हो ।

छात्र तर्फ १६ विद्यालय र छात्रा तर्फ ४ विद्यालयको सहभागिता रहेको प्रतियोगितामा छात्रतर्फ विजेता टिमले नगद ३० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ भने उप बिजेता हुने टिमले नगद २० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ । सेमिफाइनलबाट बाहिरिने टिमले नगद ५/५ रुपैयाँ प्राप्त गर्ने आयोजकले जनाएको छ ।

प्रतियोगिता अन्तरगत बिहीबार शान्ति निकुञ्ज माविका विरुद्ध कालिका मावि लक्ष्मीनगरबीच छात्रातर्फको सेमिफाइनल र जनता मावि विष्णुनगरका विरुद्ध सरस्वती नमुना माविबीच छात्रतर्फको सेमिफाइनल खेल हुने कावासोती नगरपालिका खेलकुद विकास समितिका अध्यक्ष ध्रुव खनालले जानकारी दिनुभयो ।