अन्तर विद्यालय फुटबल: मंगलबार ज्ञानोदय, जनता मावि विष्णुनगर र शान्ति निकुञ्ज विजयी

देवचुली । कावासोती १२ मा संचालित कावासोती नगर स्तरीय अन्तर विद्यालय फुटबल प्रतियोगिता अन्तरगत मंगलबार भएका खेलबाट ज्ञानोदय मावि, जनता मावि विष्णुनगर र शान्ति निकुञ्ज मावि विजयी भएका छन् । कावासोती नगरपालिका खेलकुद विकास समितिको आयोजनामा कावासोती १२ को राजमन्दिर खेल मैदानमा संचालित प्रतियोगिता अन्तरगत मंगलबार भएको ज्ञानोदय माविका विरुद्ध नवलपुर एकेडेमीबीचको पहिलो खेलमा ज्ञानोदय मावि विजयी भएको हो।

नवलपुर एकेडेमीलाई २-१ गोल अन्तरले हराउँदै ज्ञानोदय क्वाटर फाइनल प्रवेश गरेको हो । त्यसै गरि जनता मावि विष्णुनगरका विरुद्ध सेन्ट जोसेफबीच भएको दोस्रो खेलमा जनता मावि विजयी हुँदै सेमिफाइनल प्रवेश गरेको छ । जनता माविले सेन्ट जोसेफलाई ट्राइबेकरमा ५-४ गोल अन्तरले पराजित गर्दै जित निकालेको हो । मंगलबार नै भएको शान्ति निकुञ्ज माविका विरुद्ध सहिद स्मृति माध्यमिक विद्यालय बीचको खेलमा शान्ति निकुञ्ज मावि विजयी हुँदै क्वाटर फाइनलमा प्रवेश गरेको हो । शान्ति निकुञ्ज माविले सहिद स्मृतिलाई ५-० गोल अन्तरले हराएको हो ।

छात्र तर्फ १६ वडा र छात्रा तर्फ ४ वडाको सहभागिता रहेको प्रतियोगितामा छात्रतर्फ विजेता टिमले नगद ३० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ भने उप बिजेता हुने टिमले नगद २० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ । सेमिफाइनलबाट बाहिरिने टिमले नगद ५/५ रुपैयाँ प्राप्त गर्ने आयोजकले जनाएको छ । प्रतियोगिता अन्तरगत बुधबार समता शिक्षा निकेतनका विरुद्ध सरस्वती माविबीच पहिलो खेल, ज्ञानोदय माविका विरुद्ध जनता मावि शहिदनगर बीच दोस्रो खेल र शान्ति निकुञ्ज माविका विरुद्ध लर्ड बुद्ध एकेडेमी बीच तेस्रो खेल हुने कावासोती नगरपालिका खेलकुद विकास समितिका अध्यक्ष ध्रुव खनाले जानकारी दिनुभयो ।