देवचुलीमा दोस्रो वडास्तरीय टि २० क्रिकेट प्रतियोगिता हुँदै

देवचुली । देवचुली नगरपालिकामा दोस्रो वडास्तरीय टि २० क्रिकेट प्रतियोगिता हुने भएको छ । देवचुली नगर युवा तथा खेलकुद विकास समितिको आयोजनामा माघ २ गतेदेखि देवचुली १० मा रहेको रोयल क्रिकेट एकेडेमीको खेलमैदानमा प्रतियोगिता आयोजना गर्न लागिएको हो ।

प्रतियोगितामा देवचुली नगरका १३ वडाबीच प्रतिष्पर्धा रहने आयोजकले जनाएको छ । टिम दर्ताको समयभित्र १३ वटा वडाले मात्र टिम दर्ता गराएको र दर्ता भएको टिमलाई ३ समुहमा विभाजन गरिएको हो । समुहमा ए मा देवचुली ३, देवचुली ११, देवचुली १३ र देवचुली १६ रहेको छ भने समूह बी मा देवचुली १, देवचुली ५, देवचुली १२ र देवचुली १७ रहेको छ । त्यसै गरि समुह सी मा देवचुली ४, देवचुली ७, देवचुली ९, देवचुली १० र देवचुली १५ रहेका छन् । समुहमा रहेका टिमबीच प्रतिष्पर्धा गर्दै प्रत्येक समुहको बिजेता र उपबिजेता दोस्रो चरणमा प्रवेश गर्ने आयोजक संस्थाका सचिव प्रकाश काफ्लेले जानकारी दिए ।

नगरका १३ वडाबाट सहभागिता रहेको प्रतियोगितामा प्रथम हुने टिमले नगद ३५ हजार रुपैयाँसहित मेडल र ट्रफी प्राप्त गर्नेछ भने द्वितीय हुने टिमले नगद २० हजार रुपैयाँसहित मेडल र ट्रफी प्राप्त गर्नेछ । त्यसै गरि सेमिफाइनलमा पुग्ने टिमले ६ हजार ५ सय रुपैयाँ प्राप्त गर्ने आयोजक संस्थाका सदस्य चिरञ्जीवी पाण्डेले जानकारी दिए ।