देवचुली १७ मा खुला वडास्तरीय भलिबल प्रतियोगिता सुरु

देवचुली । देवचुली १७ पिप्रहरमा खुला वडास्तरीय भलिबल प्रतियोगिता सुरु भएको छ । दोस्रो पिप्रहर माघी मेला मूल आयोजक समितिको आयोजनामा पिप्रहर सामुदायिक होमस्टे नजिकको खेलमैदानमा संचालन भएको प्रतियोगिताको देवचुली १७ का वडा अध्यक्ष गणेश शर्मा चालिसे र जिल्ला खेलकुद विकास समिति नवलपुरका सचिव गिरीराज गौतमले संयुक्त उदघाटन गर्नुभएको हो ।

वडा युवा तथा खेलकुद विकास समिति देवचुली १७ को समन्वयमा संचालित प्रतियोगिता अन्तरगत देवचुली १७ पिप्रहरका विरुद्ध गैंडाकोट १५ बिचको उदघाटन खेलमा गैंडाकोट १५ ले विजयी सुरुवात गरेको छ । प्रतियोगिता अन्तरगत मंगलबार पहिलो चरण र दोस्रो चरणका खेल हुने र बुधबार सेमिफाइनल तथा फाइनलको खेल हुने दोस्रो माघी मेलाका खेल संयोजक सन्दिप पौडेलले जानकारी दिए ।

१६ टिमको सहभागिता रहेको प्रतियोगितामा बिजेता हुने वडाले नगद ४० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद २५ हजार रुपैयाँ सहित शिल्ड, मेडल र प्रमाणपत्र प्राप्त गर्नेछ ।