सातौं नगर स्तरीय फुटबल प्रतियोगिताको उपाधि कावासोती ५ लाई

नवलपुर । कावासोती नगरपालिकाको वडा नम्बर १ मा संचालित सातौं कावासोती नगर स्तरीय फुटबल प्रतियोगिताको उपाधि कावासोती ५ ले जितेको छ । कावासोती नगर खेलकुद विकास समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा संचालित प्रतियोगिता अन्तरगत कावासोती ४ का विरुद्ध कावासोती ५ बीच मंगलबार भएको फाइनल खेलमा कावासोती ५ विजयी भएको हो ।

कावासोती ५ ले कावासोती ४ लाई ट्राइबेकरमा ५-३ गोल अन्तरले हराउँदै उपाधि जित्न सफल भएको हो । निर्धारित समयको खेलमा दुवै टिमबाट १/१ को बराबरी गोल भएसँगै खेल ट्राइबेकरमा गएको थियो । निर्धारित समयको खेलमा कावासोती ४ का दुताराम सिंजालीले गोल गरेका थिए भने कावासोती ५ का सर्जित गुरुङले गोल गरेका थिए । खेलमा कावासोती ५ का विमल गुरुङ म्यान अफ दि म्याच भएका थिए ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने कावासोती ५ ले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गरेको छ भने उप बिजेता हुने कावासोती ४ ले नगद ३० हजार रुपैयाँँ सहित शिल्ड, मेडल र प्रमाणपत्र प्राप्त गरेको छ । त्यसै गरि सेमिफाइनल पुग्ने कावासोती १४ र कावासोती १७ ले १०/१० हजार रुपैयाँ प्राप्त गरेका छन् ।

बिजेता तथा उप बिजेताहरुलाई कावासोती नगरपालिकाका नगर प्रमुख विष्णुप्रसाद भुसाल, उप प्रमुख फुलकुमारी थनेत, प्रमुख प्रशासकीय अधिकृत लिलाराज पौडेलले पुरस्कार वितरण गर्नुभएको थियो ।