सातौं वडास्तरीय नाइन ए साइड फुटबल प्रतियोगिताको उपाधि देवचुली १६ लाई

देवचुली । देवचुली नगरपालिका वडा नम्बर ११ मा संचालित सातौं वडास्तरीय नाइन ए साइड फुटबल प्रतियोगिताको उपाधि देवचुली १६ ले जितेको छ । पृथ्वी समाज सेवा क्लबको ३१ औं वार्षिकोत्सव एवम् स्व. रामवीर पुलामीको स्मृतिमा पृथ्वी समाज सेवा क्लबको आयोजनामा देवचुली ११ को सुर्य किरण आधारभूत विद्यालयको खेलमैदानमा संचालन भएको देवचुली १ का विरुद्ध देवचुली १६ बिच भएको फाइनल खेलमा देवचुली १६ विजयी भएको हो ।

देवचुली १६ ले देवचुली १ लाई ट्राइबेकरमा ७-६ गोल अन्तरले हराउँदै उपाधि रक्षा गर्न सफल भएको हो। निर्धारित समयको खेलमा दुवै टिमबाट गोलरहित बराबरीसँगै खेल ट्राइबेकरमा गएको थियो । फाइनल खेलमा देवचुली १६ का गोलरक्षक सौगात महतो म्यान अफ दि म्याच भएका छन् ।

देवचुली नगरपालिकाका १६ टिमको सहभागिता रहेको प्रतियोगितामा प्रथम हुने देवचुली १६ ले नगद ६१ हजार १ सय ११ रुपैयाँसहित मेडल, ट्रफी र प्रमाणपत्र प्राप्त गरेको छ भने द्वितीय हुने देवचुली १ ले नगद ३५ हजार ५ सय ५५ रुपैयाँँ सहित मेडल, ट्रफी र प्रमाणपत्र प्राप्त गरेको छ । त्यसै गरि प्रतियोगितामा देवचुली १६ का सविन प्रजापति उत्कृष्ट खेलाडी, देवचुली १६ का सौगात महतो सर्वोकृष्ट गोलरक्षक र देवचुली १ का सन्दिप मल्ल सर्वाधिक गोलकर्ता हुँदै पुरस्कार प्राप्त गरेका आयोजक क्लबका अध्यक्ष बुद्धिबहादुर लुंगेलीले जानकारी दिनुभयो ।

पृथ्वी समाज सेवा क्लबका अध्यक्ष बुद्धिबहादुर लुंगेलीको अध्यक्षतामा भएको प्रतियोगिता समापन कार्यक्रममा देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि देवचुली नगरपालिकाका प्रवक्ता तिलप्रसाद काफ्ले, देवचुली १० का वडा अध्यक्ष रेप्तीकुमार घर्ती मगर, देवचुली १४ का वडा अध्यक्ष गोपाल थापा लगायत विभिन्न संघसंस्था पदाधिकारी लगायत खेलप्रेमीको उपस्थिति रहेको थियो ।