सातौं नगर स्तरीय फुटबल प्रतियोगिता : कावासोती ४ फाइनल प्रवेश

नवलपुर । कावासोती नगरपालिकाको वडा नम्बर १ मा संचालित सातौं कावासोती नगर स्तरीय फुटबल प्रतियोगितामा आइतबार कावासोती ४ विजयी हुँदै फाइनल प्रवेश गरेको छ । कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा संचालित प्रतियोगिता अन्तरगत आइतबार भएको दोस्रो सेमिफाइनल खेलमा कावासोती ४ विजयी भएको हो ।

कावासोती ४ ले कावासोती १४ लाई ५-१ गोल अन्तरले हराउँदै फाइनल प्रवेश गरेको हो । खेलमा कावासोती ४ का मिशन वान्टकीले २ गोल, रविन महतो, विवेक महतो र उत्तम सिंजालीले १/१ गोल गरेका थिए भने कावासोती १४ का सौरव श्रेष्ठले गोल गरेका थिए। खेलमा कावासोती १४ का सौरव श्रेष्ठ म्यान अफ दि म्याच भएका थिए । प्रतियोगिता अन्तरगत सोमबार कावासोती ४ र कावासोती ५ बिच फाइनल खेल हुने आयोजकले जनाएको छ ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने वडाले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद ३० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ।

प्रतियोगिताको सेमिफाइनल पुग्ने दुई टिमले १०/१० हजार रुपैयाँ पाउनेछन् । त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सवोकृष्ट गोलरक्षकलाई पुरस्कारको व्यवस्था रहेको कावासोती नगर खेलकुद विकास समितिका अध्यक्ष ध्रुव खनालले जानकारी दिनुभयो ।