सातौं नगर स्तरीय फुटबल प्रतियोगिता : कावासोती ५ फाइनल प्रवेश

नवलपुर । कावासोती नगरपालिकाको वडा नम्बर १ मा संचालित सातौं कावासोती नगर स्तरीय फुटबल प्रतियोगितामा शुक्रबार कावासोती ५ विजयी हुँदै फाइनल प्रवेश गरेको छ । कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा संचालित प्रतियोगिता अन्तरगत शुक्रबार भएको पहिलो सेमिफाइनल खेलमा कावासोती ५ विजयी भएको हो ।

कावासोती ५ ले कावासोती १७ लाई ट्राइबेकरमा ४-२ गोल अन्तरले हराउँदै फाइनल प्रवेश गरेको हो । निर्धारित समयको खेलमा दुवै टिमबाट १/१ को बराबरी गोल भएसँगै खेल ट्राइबेकरमा गएको थियो । खेलमा कावासोती १७ का मनिष बिक म्यान अफ दि म्याच भएका थिए । प्रतियोगिता अन्तरगत शनिबार  कावासोती ४ का विरुद्ध कावासोती १४ बीच दोस्रो सेमिफाइनल खेल हुने आयोजकले जनाएको छ ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने वडाले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद ३० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ। प्रतियोगिताको सेमिफाइनल पुग्ने दुई टिमले १०/१० हजार रुपैयाँ पाउनेछन् । त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सवोकृष्ट गोलरक्षकलाई पुरस्कारको व्यवस्था रहेको कावासोती नगर खेलकुद विकास समितिका अध्यक्ष ध्रुव खनालले जानकारी दिनुभयो ।