सातौं नगर स्तरीय फुटबल प्रतियोगिता : आइतबार कावासोती ८ र कावासोती १६ विजयी

नवलपुर । कावासोती नगरपालिकाको वडा नम्बर १ मा संचालित सातौं कावासोती नगर स्तरीय फुटबल प्रतियोगितामा आइतबार कावासोती ८ र कावासोती १६ विजयी भएका छन् । कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा संचालित प्रतियोगिता अन्तरगत आइतबार भएको पहिलो खेलमा कावासोती ८ विजयी भएको हो ।

कावासोती ८ ले कावासोती ९ लाई ५-१ गोल अन्तरले हराउँदै दोस्रो चरणमा प्रवेश गरेको हो । पहिलो खेलमा कावासोती ८ का अमृत राई म्यान अफ दि म्याच भएका थिए । त्यसैगरी आइतबार नै भएको कावासोती १५ र कावासोती १६ बिचको खेलमा कावासोती १६ विजयी भएको छ । कावासोती १६ ले कावासोती १५ लाई १-० गोल अन्तरले हराउँदै दोस्रो चरणमा प्रवेश गरेको हो । दोस्रो खेलमा कावासोती १५ का टिकाराम गुरुङ म्यान अफ दि म्याच भएका थिए । प्रतियोगिता अन्तरगत सोमबार पहिलो खेल कावासोती २ का विरुद्ध कावासोती ४ र दोस्रो खेल कावासोती १३ का विरुद्ध कावासोती १७ बीच हुने आयोजकले जनाएको छ ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने वडाले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद ३० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ। प्रतियोगिताको सेमिफाइनल पुग्ने दुई टिमले १०/१० हजार रुपैयाँ पाउनेछन् । त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सवोकृष्ट गोलरक्षकलाई पुरस्कारको व्यवस्था रहेको कावासोती नगर खेलकुद विकास समितिका अध्यक्ष ध्रुव खनालले जानकारी दिनुभयो ।