देवचुलीको भीमसेनमा ध्यान कक्षको स्थापना

देवचुली । देवचुली नगरपालिका वडा नम्बर ७ मा रहेको भीमसेन आदर्श नमुना माध्यमिक विद्यालयमा ध्यान कक्ष स्थापना गरिएको छ । पहिलो विश्व ध्यान दिवशको अवसरमा विद्यालयमा ध्यान कक्ष स्थापनासँगै स्वजागरण ध्यान साधना गरिएको हो ।

विद्यालयमा ध्यान कक्ष स्थापना गरि विद्यार्थीहरुलाई निरन्तर ध्यान र योगको कक्षा संचालन गर्ने विद्यालयका प्रधानाध्यापक अग्निधर भुसालले बताउनुभयो । नवलपुर जिल्लामै सम्भवत पहिलो योग कक्ष स्थापना गर्ने भीमसेन भएको उहाँले दाबी गर्नुभयो । पढाई सँगसँगै विद्यार्थीहरुलाई ध्यान आवश्यक भएकाले विद्यालयले योग कक्ष नै स्थापनालाई प्राथमिकता दिएको उहाँले बताउनुभयो ।

भीमसेन आदर्श नमुना माध्यमिक विद्यालयका व्यवस्थापन समितिका अध्यक्ष भुमिलाल लामिछानेको अध्यक्षतामा भएको योग कक्षको उदघाटन कार्यक्रममा विद्यालयका प्रधानाध्यापक अग्निधर भुसाल, व्यवस्थापन समितिका पदाधिकारी, जीवन विज्ञान परिषद देवचुलीका सचिव कृष्ण कंडेल, विद्यालयका शिक्षक, विद्यार्थीको उपस्थिति रहेको थियो ।

कार्यक्रममा योग र ध्यानको महत्वको बारेमा जीवन विज्ञान परिषद देवचुलीका सचिव कृष्ण कंडेल सहजीकरण गर्दै स्वजागरण साधना गराउनुभएको थियो । ध्यान दिवस मनाउनका लागि मात्र नभई विद्यालयमा निरन्तर संचालन गर्ने गरि ध्यान कक्षको स्थापना गरिएको विद्यालय व्यवस्थापन समितिका अध्यक्ष भूमिलाल लामिछानेले बताउनुभयो । सदैव नवीन कार्यमा भीमसेन अगाडि रहने उहाँले बताउनुभयो ।