सातौं नगर स्तरीय फुटबल प्रतियोगिता : कावासोती ३ को विजयी सुरुवात

नवलपुर । कावासोती नगरपालिकाको वडा नम्बर १ मा सातौं नगर स्तरीय फुटबल प्रतियोगिता सुरु भएको छ । कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा प्रतियोगिता सुरु भएको हो । प्रतियोगिताको कावासोती नगरपालिकाका नगर प्रमुख विष्णप्रसाद भुसालले उद्घाटन गर्नुभएको हो ।

शुक्रबार भएको उद्घाटन खेलमा कावासोती ३ विजयी भएको छ । कावासोती ३ ले कावासोती ७ लाई ५-१ गोल अन्तरले हराउँदै कावासोती ३ दोस्रो चरणमा प्रवेश गरेको हो । आजको खेलमा कावासोती ३ का प्रकाश पुन मगर म्यादन अफ दि म्याच भएका थिए । प्रतियोगिता अन्तरगत शनिबारको पहिलो खेल कावासोती ६ का विरुद्ध कावासोती १० र दोस्रो खेल कावासोती १२ का विरुद्ध कावासोती १४ बीच हुने आयोजकले जनाएको छ ।

कावासोती नगरपालिकाका १७ वडाबीच प्रतिष्पर्धा हुने प्रतियोगितामा प्रथम हुने वडाले नगद ५० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ भने उप बिजेता हुने वडाले नगद ३० हजार रुपैयाँ सहित शिल्ड, मेडल र प्रमाणपत्र प्राप्त गर्नेछ । प्रतियोगिताको सेमिफाइनल पुग्ने दुई टिमले १०/१० हजार रुपैयाँ पाउनेछन् । त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सवोकृष्ट गोलरक्षकलाई पुरस्कारको व्यवस्था रहेको कावासोती नगर खेलकुद विकास समितिका अध्यक्ष ध्रुव खनालले जानकारी दिनुभयो ।