देवचुली गोल्डकप : उपाधिका लागि अभिषेक चर्च रजहर र गैंडाकोट फुटबल क्लब भिड्दै

देवचुली । देवचुली १० मा संचालित प्रथम देवचुली गोल्डकप फुटबल प्रतियोगिताको उपाधिका लागि शनिबार अभिषेक चर्च रजहर र गैंडाकोट फुटबल क्लब प्रतिष्पर्धा गर्दैछन् । शान्तिदिप युवा क्लबको आयोजनामा देवचुली नगर रंगशालामा मंसिर ७ गतेसम्म संचालित प्रतियोगितामा अभिषेक चर्च रजहर र गैंडाकोट फुटबल क्लबबीच फाइनल खेल हुन लागेको हो ।

अभिषेक चर्च रजहरले सेमिफाइनलमा सेन्टर कलेज अठाइस बिगाहालाई हराउँदै फाइनल प्रवेश गरेको हो भने गैंडाकोट फुटबल क्लबले योङ ब्वाइज चितवन निर्धारित समयमा खेलमैदानमा नआएपछि वाक ओभर पाएर फाइनल प्रवेश गरेको हो ।

नवलपुर , चितवन र नवलपरासी पश्चिमका १४ टिमको सहभागिता रहेको प्रतियोगितामा बिजेताले २ लाख ७५ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने उपबिजेता हुने टिमले १ लाख ५० हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ। प्रतियोगितामा सेमिफाइनलबाट बाहिरिएका सेन्टर कलेज २८ बिगाहा र योङ ब्वाइज चितवनले २५/२५ हजार प्राप्त गरेका छन् । त्यसै गरि उत्कृष्ट खेलाडी, सर्वोकृष्ट गोलरक्षक, सर्वाधिक गोलकर्ता तथा अनुशासित टिमलाई नगद ५ हजार रुपैयाँँ पुरस्कारको व्यवस्था रहेको शान्तिदिप युवा क्लबका अध्यक्ष अमरबहादुर घर्ती मगरले बताउनुभयो ।

देवचुली नगरपालिका संरक्षक रहेको प्रतियोगितामा देवचुली १० वडा कार्यालय, वडा युवा तथा खेलकुद विकास समिति देवचुली १०, देवचुली नगर युवा तथा खेलकुद विकास समिति, जिल्ला खेलकुद विकास समिति नवलपुर, जिल्ला फुटबल संघ नवलपुरको सहकार्य र समन्वय रहेको छ । प्रतियोगिताको प्रायोजक सदभाव इन्टरनेशनल एजुकेसन रहेको छ ।