वडास्तरीय खुला भलिबल प्रतियोगिता : मंगलबार दोस्रो चरण र क्वाटर फाइनलका ६ खेल सम्पन्न

देवचुली । देवचुली ७ मा संचालित वडास्तरीय खुला भलिबल प्रतियोगितामा मंगलबार दोस्रो चरण र क्वाटरफाइनलका ६ वटा खेल सम्पन्न भएका छन् । वडा खेलकुद विकास समिति देवचुली ७ को आयोजना, देवचुली ७ वडा कार्यालयको सहकार्य र नगर युवा तथा खेलकुद विकास समितिको समन्वयमा देवचुली ७ मा रहेको लालीगुँरास युवा क्लबको प्राङ्गणमा मंसिर १५ गतेदेखि संचालित वडास्तरीय खुला भलिबल प्रतियोगितामा मंगलबार छ खेल सम्पन्न भएका हुन् ।

मंगलबार भएको पहिलो खेलमा मधुकोटले राईकोटलाई २-० को सोझो सेटले हराएको थियो भने दोस्रो खेलमा शंखदेवले आमडाँडा लाई २-० को सोझो सेटले नै हराएको थियो । त्यसै गरि तेस्रो खेलमा आयोजक (ए) ले मुण्डेलाई २-० को सोझो सेटले, चौथो खेलमा आमडाँडाले हातीखोरलाई २-० को सोझो सेटले, पाँचौ खेलमा हिमोहोरी जापानले मधुकोट (बी) लाई २-० को सोझो सेटले र छैठौं खेलमा आहालेले आयोजक ( बी) लाई २-० को सोझो सेटले हराएको वडा खेलकुद विकास समिति देवचुली ७ का अध्यक्ष मनिष आले मगरले जानकारी दिए ।

१३ टिमको सहभागिता रहेको प्रतियोगितामा प्रथम हुने टिमले नगद २५ हजार रुपैयाँ सहित ट्रफी, मेडल र प्रमाणपत्र प्राप्त गर्नेछ भने उप बिजेता हुने टिमले नगद १५ हजार रुपैयाँ सहित ट्रफी, मेडल र प्रमाणपत्र प्राप्त गर्नेछ । त्यसै गरि तृतीय र चौथो हुने टिमले ५/५ हजार रुपैयाँ प्राप्त गर्ने आयोजकले जनाएको छ । प्रतियोगिता अन्तरगत बुधबार आहाले र मधुकोटबीचको क्वाटर फाइनलको खेल साथै तिनघरे र बाह्रकोलबीच अन्तिम क्वाटरफाइनलको खेल हुने जनाइएको छ ।