देवचुली १० मा प्रथम देवचुली गोल्डकप फुटबल प्रतियोगिता हुने

देवचुली । देवचुली १० मा प्रथम देवचुली गोल्डकप फुटबल प्रतियोगिता हुने भएको छ । शान्तिदिप युवा क्लबको आयोजनामा मंसिर ७ गतेबाट प्रतियोगिता सुरु गर्न लागिएको हो । देवचुली नगरपालिका संरक्षक रहेको प्रतियोगितामा देवचुली १० को कार्यालय, जिल्ला खेलकुद विकास समिति नवलपुर, देवचुली नगर युवा तथा खेलकुद विकास समिति, वडा खेलकुद विकास समिति देवचुली १० को सहकार्य र समन्वयमा देवचुली १० मा रहेको नगरस्तरीय रंगशालामा प्रतियोगिता संचालन गर्न लागिएको हो।

१६ टिमको सहभागिता संचालन हुन लागेको प्रतियोगितामा प्रथम हुने टिमले २ लाख ७५ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने उपबिजेता हुने टिमले १ लाख ५० हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ। प्रतियोगिताको सेमिफाइनल पुग्ने २ टिमले २५ हजार रुपैयाँँ नगद समेत प्राप्त गर्नेछन् ।

त्यसै गरि उत्कृष्ट खेलाडी, सर्वोकृष्ट गोलरक्षक, सर्वाधिक गोलकर्ता तथा अनुशासित टिमलाई नगद ५ हजार रुपैयाँँ पुरस्कारको व्यवस्था रहेको शान्तिदिप युवा क्लबका अध्यक्ष अमरबहादुर घर्ती मगरले जानकारी दिए । देवचुलीमा प्रत्येक वर्ष निरन्तर गोल्डकप खेलाउने गरि यस वर्षबाट प्रतियोगिता सुरु गरिएको र सहभागी टिमले ३ जना भन्दा बढी विदेशी खेलाडी खेलाउन नपाउने उनले बताए । खेलका लागि मंसिर ३ गतेसम्म टिम दर्ता गर्न सकिने र टिम दर्ताका लागि १० हजार रुपैयाँ शुल्क लाग्ने आयोजकले जनाएको छ ।